Reportajen Silvino Freitas
Komunidade Suku Lihu Postu Administrativu Railaco munisípiu Ermera balun sei enfrenta difikuldade bee moos no estrada rurál, tanba impktu husi udan hamosu erozaun no mota boot.
Xefe Suku Lihu, Bernardo do Santos Babo hateten, problema ne’ebé komunidade hasoru la duun grave tanba suku Lihu hanesan suku urbana ne’ebé lokaliza iha vila postu nian, maibé iha mós difikuldade balun ne’ebé prezisa aprezenta maka esrtrada, no bee moos.
“Estrada husi vila mai suku ne’e di’ak maibé husi suku ba aldeia maka to’o agora balun hetan ona atensaun husi PNDS no balun seida’uk, bee moos ami iha difikuldade uituan bainhira udan mosu inundasaun entaun mosu failansu balun ba komunidade” dehan Xefe suku iha Suku Lihu Railaco Ermera, (10/05).
Nia dehan tan, iha aldeia Hi dadaun atu implementa husi PNDS maibé kanalizasaun seidauk hahú no populasaun liu 500 no uma kain liu 150, bee moos kanaliza ona maibé kuandu udan susar atu asesu ho di’ak no iha ona alternativu maka uza sistema bomba maibé to’o dadaun ne’e projeitu seidauk remata, iha tempu bailoron volume bee menus nune’e difikuta komunidade sira atu asesu bee moos ho di’ak.
“Ami iha aldeia 4 iha aldeia ida mak ligasaun ba suku Leorema Likisá nian, foin dadaun ne’e IGE sira mai hadia tiha ona, atu hala’o fali PNDS nian maibé seida’uk tanba husi mota atu ba Leorema ne’e mota tuun hodi sobu entaun komunidade atu ba foti rai-henek no fatuk labele” nia dehan.
Nia konklui katak, kona-ba problema sira hato’o ona ba iha PNDS munisípiu atu tau atensaun iha tinan ida ne’e iha fulan maiu no junu nia laran, entretantu suku Lihu iha populasaun hamutuk liu 1600 no uma kain 374.
