Home Justisa Xefe Redasaun Hatutan Apresia Desizaun Konsellu Superiór Ministériu Públiku, Uza Direitu Resposta...

Xefe Redasaun Hatutan Apresia Desizaun Konsellu Superiór Ministériu Públiku, Uza Direitu Resposta No Ratifikasaun

578
0
Xefe Redasaun Hatutan, Francisco Belo. [Foto: David | 17.07.2023]

Reportajen David da Costa

Relasiona ho Ministériu Públiku ne’ebé halo notifikasaun ba jornalista Media Online Hatutan.com Rogério Pereira Carceres ho nia Xefe Redasaun Francisco Belo Simões da Costa, iha kuarta (12/07/2023) Konsellu Superiór Ministériu Públiku, distribui klarifikasaun ofisial liuhosi komunikadu imprensa kona-bá prosesu notifikasaun ne’ebé Ministériu Públiku halo hasoru Jornalista no xefe redasaun Media online Hatutan.com.  Ho ida ne’e Xefe Redasaun Hatutan.com apresia ho desizaun konsellu superiór ministériu públiku nian ne’ebé uza Lei Komunikasaun Sosiál artigu 34 kona-bá direitu resposta no ratifikasaun.

Xefe Redasaun Hatutan.com, Francisco Belo Simões da Costa, hateten, iha kontextu ida-ne’e nu’udár Xefe Redasaun ne’ebé hetan notifikasaun hosi Ministériu Públiku, apresia ho desizaun Konsellu Superiór Ministériu Públiku nian ne’ebé uza lejislasaun sira ne’ebé vigora iha Timor-Leste, liu-liu Lei Komunikasaun Sosiál artigu 34 kona-bá direitu resposta no ratifikasaun.

Iha loron 12 fulan jullu 2023, redasaun Hatutan.com simu ona distribuisaun komunikadu hosi Konsellu Superiór Ministériu Públiku nian hodi halo klarifikasaun ofisiál kona-bá prosesu notifikasaun ne’ebé Ministériu Públiku halo ba jornalista no Xefe Redasaun Hatutan.com.

“Iha klarifikasaun ne’e, Konsellu Superiór Ministériu Públiku fó klareza katak, notifikasaun ne’ebé fó ba jornalista no Xefe Redasaun Hatutan.com ne’e hanesan sasin, la’ós hanesan arguidu no mós la’ós hanesan suspeitu,”  dehan Xefe Xedasaun Hatutan.com Francisco Belo Simões da Costa, liuhusi konferensia Imprensa iha edifisiu Konsellu Imprensa Kintal Boot, segunda 17/07.

Maibé iha  komunikadu ne’ebé Konsellu Superiór Ministériu Públiku halo klarifikasaun loloos katak ba prosesu ida la’ós atu kriminaliza produtu jornalistiku, maibé notifika hanesan sasin atu bele presta deklarasaun balun relasiona ho kazu internal  ne’ebé akontese iha Prokuradoria.

“Ho nune’e, reprezenta Hatutan.com, ami apresia ho desizaun Konsellu Superiór Ministériu Públiku nian, apresia ho Prokuradór Jerál Repúblika nia aktu, ninia klarifikasaun ne’ebé mais klaru teb-tebes, i kumpri ba ita nia Lei Komunikasaun Sosiál iha artigu 34 ne’e no ida ne’e hanesan jornalista, membru Konsellu Imprensa,  atitude ne’ebé iha sai mós hanesan presedente di’ak ba membru órgaun soberanu sira seluk atu banati tuir,” nia apresia.

Tanba Produtu Jornalistiku bainhira afeita pessoál ruma, afeita pessoál singular ka koletiva ruma, meiu ka dalan ne’ebé loos liu maka uza direitu resposta no ratifikasaun, la’ós kriminaliza produtu jornalistiku.

Entretantu iha Kuarta (12/07/2023), Konsellu Superiór Ministériu Públiku, distribui klarifikasaun ofisial liuhosi komunikadu imprensa kona-bá prosesu notifikasaun ne’ebé Ministériu Públiku halo hasoru jornalista Media online Hatutan.com, Rogério Pereira Cárceres ho Xefe Redasaun  Francisco Belo Simões da Costa.  Iha Nota Ba Komunikasaun Sosiál ne’ebé fó sai husi Prezidente Konsellu Superiór Ministériu Públiku asina hosi Prezidente Konsellu Superiór Ministériu Públiku Alfonso Lopez nu’udár  Prokuradór Jerál Repúblika (PGR).

Tuir mai Meon Metin sita konteúdu hosi nota komunikadu imprensa hosi Konsellu Superiór Ministériu Públiku ne’ebé asina hosi Prezidente Konsellu Superiór Ministériu Públiku Alfonso Lopez nu’udár  Prokuradór Jerál Repúblika (PGR).

Fó-sai ona notísia, komentáriu no informasaun sira liuhosi komunikasaun sosiál oioin relasionadu ho inkirisaun ba Srs. Rogério Pereira Cárceres no Francisco Simões Belo da Costa, jornalista no xefe redasaun, hosi Jornál on-line – hatutan.com, iha ámbitu prosesu inkéritu dixiplinár ida, ne’ebé ninia prosedimentu sira la’o hela iha Konsellu Superiór Ministériu Públiku, hodi hamosu dúvida iha opiniaun públiku.  

Hodi esklarese opiniaun públiku, atu labele iha tan dúvida, Konsellu Superiór Ministériu Públiku, hafoin reune tiha iha nia sesaun ordinária iha loron-10 fulan-Jullu tinan-2023, delibera, liuhosi unanimidade, informa katak:

Ministériu Públiku la instaura prosesu-krime ruma hasoru Srs. Rogériu Pereira Cárceres no Francisco Simões da Costa Belo, jornalista no xefe redasaun, hosi Jornál On-line hatutan.com, no la konstitui sira hanesan arguidu hafoin publikasaun artigu ne’ebé ho títulu “Deskonfia PJR Alfonso Lopez, ho nia Asesór Jurídiku Óscar Tavares Uza osan Estadu halo Viajen Privadu iha Portugal”.

La eziste iha órgaun ka servisu sira Ministériu Públiku nian kualker prosesu-krime  kontra jornalista relasionadu ho ezersísiu sira-nia funsaun sira.

Liuhosi Deliberasaun n.o 41/KSMP/2023 hosi Konsellu Superiór Ministériu Públiku, loron-29 fulan-Maiu tinan ida ne’e, instaura tiha prosesu inkéritu dixiplinár internu ida, hodi apura responsabilidade funsionáriu no ajente sira Servisu Apoiu Tékniku no Administrativu Prokuradoria-Jerál Repúblika nian relasiona ho divulgasaun públika dokumentu no informasaun ne’ebé protejidu hosi sijilu profisionál, ne’ebé ninia prosedimentu sira la’o hela iha Servisu Inspesaun Ministériu Públiku nian.

Iha ámbitu hosi prosesu inkéritu dixiplinár ida ne’e, mak halo tiha inkirisaun ba sidadaun sira Rogério Pereira Cárceres no Francisco Simões da Costa Belo ho kualidade hanesan sasin, tanba sira iha koñesimentu kona-ba faktu hirak ne’ebé sai nu’udar objetu ba prosesu inkéritu dixiplinár refere.

Relasionadu ho notísia sira ne’ebé publika hosi Jornál “Timor Post” no Jornal Independente iha loron-03 fulan-Jullu tinan ida ne’e, atribui tiha ba Prezidente Asosiasaun Jornalista Timor-Lorosa’e (AJTL), Konsellu Superiór Ministériu Públiku esklarese katak Ministériu Públiku laiha kompeténsia legál atu define krime sira, tanba matéria krime sira nu’udar Kompeténsia Parlamentu Nasionál no Governu nian, liuhosi autorizasaun Parlamentu Nasionál.

Print Friendly, PDF & Email

LEAVE A REPLY

Please enter your comment!
Please enter your name here