Home Notisia FOKUPERS: Ita Hotu Luta Kontra Inimigu Hanesan Halakon Violensia Domestika, Insestu no...

FOKUPERS: Ita Hotu Luta Kontra Inimigu Hanesan Halakon Violensia Domestika, Insestu no Violensia Seksual

1332
0
FOKUPERS Selebra loron nasional feto iha munisipiu Bobonaro. [Foto: Santy | 10.11.2023]

Reportajen Santy Lucia da Costa

Forum Komunikasaun ba Feto Timor-Leste (Fokupers) hamutuk ho Autóridade Munisipiu Bobonaro selebra loron Nasional Feto ba dala-47 iha Munisipiu Bobonaro, Postu-Administrativu  Maliana,  liuhusi  atividade  seminariu ho tema, “Hamutuk ita promove Maria Tapo nia obra sira hodi dignifika feto nia direitu fundamental sira”.

Objetivu husi serimónia ida ne’e atu festeza hamutuk ho komunidade munisípiu Bobonaro kona-ba valór loron nasional feto ho liu-liu feto no komunidade munisípiu Bobonaro bele hatene koñese di’ak liutan istória kona-ba Maria Tapó no eroina sira nia istória luta ba ukun-rasik aan.

Iha parte seluk atu bele enkoraja feto no komunidade munisípiu Bobonaro atu dignifika no imita espíritu luta husi Maria Tapó no eroina sira nian, nune’e sira bele kontribui ba dezenvolvimentu nasional ohin loron nian.

Iha ambitu selebrasaun ne’e, Diretóra Ezekutiva Fokupers, Maria Fátima P. Guterres, hateten, Importante tebes atu selebra loron ida ne’e, iha Munisipiu Bobonaro, tanba iha eroina Maria Tapó nia istória ida ne’e mak ita konsege hamosu loron 3 Novembru, sai hanesan loron nasional feto. Eroina Maria Tapó ho nia aten brani boot ho nia espiritu, maske la tuir prosesu treinu atu sai hanesan Falintil sira ba mai, maibé ho nia aten brani ne’ebé nia koko tulun nia laen, hodi kontra inimigu.

“Hau hanoin katak, ita iha responsabilidade  todan ida, atu kontinua obra ita nia eroina sira nian, maske indireitamente sira la oferese mai ita kilat sira ne’ebé iha sira nia liman laran, maibé espiritu luta ne’ebé iha sira oferese hela itu ita kontinua, kilat sira ne’ebé agora dadaun ita iha atu kontra mak, ita nia inimigu boot ida atu halakon dizigualdade ne’ebé iha liuliu situasaun Bobonaro nian ne’ebé oras ne’e dadaun akontese iha suku balun, ne’ebé afeita ba feto no labarik sira mak sai vitima.” Dehan, Diretóra Ezekutiva Fokupers, Maria Fátima P. Guterres, iha salaun Postu-Administrativu Maliana, 8/11/2023.

Maria Fátima P. Guterres, realsa tan katak, Ita nia mehi ne’ebé ita hakarak tebes mak, moris iha situasaun Paz, hakmatek no bem komun. Atu atiji vizaun ida ne’e, laos ita mesak, laos ema ida nia serbisu no organizasaun ida nia serbisu, maibé ne’e ita hotu nia serbisu atu luta kontra inimigu sira, hanesan halakon violénsia doméstika iha uma laran, halakon insestu, violénsia seksual ne’ebé sei buras iha komunidade.

 “Ita hanoin katak, atu tulun ita oinsa ita bele hatene di’ak liu tan serbisu maka’as luta eroina sira nian, bele kaer metin valór no prinsipiu sira ne’ebé iha tanba sira la husik hela mai ita kilat atu funu, maibé ita hanoin dehan kilat ne’ebé ita presija kontinua mak valór importante sira ne’ebé iha katak, presija iha prinsipiu atu defende lia-loos, igualdade nian no prinsipiu atu halakon mukit hodi kontinua luta ba bem komun sosial nian.” Tenik, Diretóra Ezekutiva Fokupers,

Iha fatin hanesan, Reprezentante Autóridade Munisipiu Bobonaro, Eurosia Maria M. Doutel Sarmento, agradese ba Fokupers ne’ebé mak hili Munisipiu Bobonaro hodi selebra loron nasional feto.

Atúal Diretóra Asaun Sosial, Autóridade Munisipiu Bobonaro ne’e konsidera, liuhusi selebrasaun ne’e bele motiva feto Bobonaro, hatutan prinsipiu aten brani ne’ebé eroina Maria Tapó no eroina sira didika ona nasaun Timor-Leste.

“Maria Tapó nia obra maka aten brani, responsabilidade no domin ne’ebé ida sai hanesan motivasaun ida hodi enkoraja ita feto hotu, espesial ita feto Bobonaro atu banati tuir hahalok aten barani ida ne’e, iha nivel ka aspeitu hotu inklui iha uma-kain, brani atu desidi, brani atu kompete, brani kontra aktus Violénsia, nune’e hodi moris iha dame, justu, livre husi violénsia.”hateten, Reprezentante autóridade Munisipiu Bobonaro.

Partisipasaun Seminariu komemorasaun loron nasional feto ne’e, partisipa husi Eis-Daputada V Lejislatura, Sra. Domingas dos Santos, PDHJ, Lideransa Komunitaria, VPU/PNTL Bobonaro, Estrutura Assosiasaun feto potensial  Munisipiu Bobonaro, Organizasaun Sosiedade Sivil iha Bobonaro, Estudantes,  no seluk tan. Atividade ne’e, realiza, hetan apoiu fundus husi Oxfam iha Timor-Leste.

Print Friendly, PDF & Email

LEAVE A REPLY

Please enter your comment!
Please enter your name here