Reportajen Silvino Freitas
Ajénsia implementadór AHP Consortium hamutuk ho parseiru implementador sira realiza workshop hodi reflete susesu, dezafiu no planu futuru sustentabilidade projetu Dezastre PRONTU neebe sei no implementa ona iha munisipiu 5 ba prevensaun no mitigasaun risku dazastre naturais impaktu husi mudansa klimátika.
Manajer Komunikasaun Liaison ba AHP Consortium Aprilia de Jesus dehan, pareseria umanitaria husi Australia nian neebe mai husi ajensia 5 maka CARE, CARITAS, PLAN Internasional, Oxfam iha Timor-Leste no World-Visions ho nia parseiru implementador sira hamutuk 16 husi area operasional 7 fahe susesu no dezafiu ba malu tanba liuhusi reflekasaun annual neebe akontese iha Vikeke, nunee husi fulan nee sira bele haree atijnjimentu neebe akontese ona iha komunidade nian liuliu iha area desastre nian iha komite suku nian konaba formasaun husi komunidade husi Oecusse, Likisa, Vikeke, Bobonaro, Ainaro.
“iha nee mos husi APC tanba ami servisu hamutuk ho governu entaun ami fahe ba malu esperensia neebe ami iha, nunee mos projetu nee sei hotu iha tinan oin karik projetu nee hotu oinsa nia sustentabilidade ba oin nee oinsá” Manajer Komunikasaun Liaison ba AHP Consortium Aprilia de Jesus iha Tower-Fatuhada, (26/11).
Nia dehan tan, liuhusi projetu nee sira atinji ona kolaborasaun diak entre APC no komunidade sira nunee projetu nee implementa husi konsorsium ho ajensia 5 sira iha Oecusse, Bobonaro, Likisa no Vikeke no forma Casades hodi fo formasaun hodi atende komunidade bainhira akontese dezastre iha suku sira, projetu refere foku liu ba dezastre sira natural sira hanesan inundasaun no anin boot.
Fatin hanesan Jezuinho dos Reis Prezidente Autoridade Protesaun Civil (APC) dehan, Timor-Leste vulnerável tebes ba dezastre naturál sira hanesan inundasaun, rai-monu, bai-loron naruk, anin-bo’ot ne’ebé ninia frekuensia aumenta ba bebeik no intensu tamba mudansa klimátika, nunee inundasaun iha 2021 hatudu ona ba ita katak eventu sira nee bele lori impaktu negativu sira ba komunidade, ita nia infraestrutura, no ita nia ekonomia.
“Worskhop Refleksaun semi anual Projeito Dizaster Prontu, liu husi AHP Consortium, konvida no halibur parseiros no participante programa implementa projeitu Dizaster Prontu sira nia hanoin no progresu sira hodi mellora diak liu estrategia sira ba resiliensia hodi hasoru perigu dezastre sira iha futuru” dehan prezidente APC Jezuinho dos Reis.
Nia konklui, workshop semi anual refleksaun ba implementasaun Projeitu Dezastre Prontu nee ho hanoin atu hakarak hetan feeback sira konaba progressu, frakeza sira no rekomendasaun sira ne’ebe iha atu implementa ba projeitu Dezastre prontu tuir mai, APC ho orgullu bo’ot kolabora ho DFAT no AHP Consertium, hodi hare ba Projeitu Dezastre Prontu ne’ebe implementa iha area targeitu sira tuir projeito nia kolokasaun, hodi minimiza impaktu sira mai husi Mudansa Klima iha Timor-Leste, nunee servisu hamutuk nee, sei fo ona passu importante ida ba Timor-Leste ne’ebe reziliente liu tan no sei kompriende diak liu tan impaktu Mudansa Klimatiku ne’ebe iha hodi kontribui ba Redusaun Risku Dezastreiha Timor-Leste.
