Reportajen Adalgisa Pereira
Forum Organizasaun non-Governmental Timor-Leste (FONGTIL) no Komisaun Nasional Eleisaun (CNE) organiza forum diálogu ho tópiku “Iha sansaun ho penalti aktu irregularidade ne’ebe komete husi kandidatu Prezidente Repúblika iha ambitu kampaña elisaun prezidensiál”.
Nune’e iha forum diálogu ne’e kandidatu independente ba Prezidente Republika, Virgilio Guterres dezafia CNE karik iha kandidatu balun komete iregulaidade sira bele foti desizaun.
Iha fatin hanesan Vice Prezidente Komisaun Nasional Eleisaun hateten, se deit komete irregularidade tenke prosesu tuir lei, tanba ema hotu hakruk ba lei, tanba ema hotu-hotu iha lei nia okos .
“Ami hakruk deit ba lei, ami la hakruk ba lideransa se deit, ba kandidatu se deit se mak viola, lei mak iha ita nia leten, ita hotu hakruk ba lei no konstituisaun ba kodigu penal no regulamentu sira ne’ebe mak iha, atu maun boot ka se de’it prosesu lao nafatin, tanba ita iha regulamentu, ne’ebe governu dekreta no mos iha kodigu penal, iha artigu 229 no 243 koalia kona ba krime eleitorál halo impedimentu ruma, no aktu ida ne’ebe mak halo iha tempu kampaña votasaun, ida nee regula hotu iha konfigurasaun pena” dehan Vice Prezidente CNE, Domingos Bareto iha salaun CNE 11/02
CNE mos halo ona liña koordenasaun ho polisia sira, oinsa mak atu implementa lei nee, no halo mos liña koordenasaun ho Ministériu Públiku, Tribunal no sei halo reuniaun ho Komandante Polisia sira hotu iha munisípiu 12 inklui RAEOA.
