Reportajen Santina Lucia da Costa
Kandidatu Prezidente Republika husi Partidu Congresso Nacional de Reconstruҫão de Timor-Leste (CNRT) ho númeru sorteiu 1, Dr. José Ramos Horta iha nia komprimisu politika bainhira eleitu ba Prezidente Republika sei koopera ho parte hotu, hodi dezenvolve ekonomia.
Iha ambitu mini kampaña, Kandidatu Prezidente Republika, Dr. José Ramos Horta hateten, Prezidente Republika tenki halibur ema hotu, tenki atensaun maka’as ba politika rejional, Internasional, inklui situasaun ekonomika.
“Kampaña hotu ita tenki hanoin futuru ba rai ida ne’e, hanesan ekonomia tenki numeru 1, maibé atu la’o di’ak tenki iha governu forte, lideradu husi ema ida matenek.” dehan, Kandidatu PR, Ramos Horta iha nia komprimisu politika iha Triloka, Munisipiu Baucau, Sabado, 9/4.
Horta dehan Prezidente Republika ho Primeiru Ministru situasaun ida ne’e haree preokupante ekonomia nian, konvoka malu haree koalia ho lider sira seluk para, diskute situasaun internasional ne’e.
“Ita nia ekonomia monu 8%. Agora situasaun mundial komplikadu liu tan, haree situasaun mundial preokupadu los. Folin mina sa’e maka’as, ita hetan osan balun tan mai husi Bayu Undan, folin sasan hotu-hotu sa’e, valor forsa dollar nian tun.” Salienta, Ramos Horta.
Horta akresenta tan katak, Prezidente Republika ema ida ké halibur lider sira hotu, tenki tau atensaun maka’as ba politika rejional, internasional, situasaun ekonomika, hamutuk ho Primeriu Ministru koalia beibeik, presija ajuda bolu ema hosi liur koalia via online, tanba agora meiu komunikasaun fasil loos atu koalia.
“Kuandu covid-19 hahú hau koalia ho sientista sira iha Israel, Australia, Alemaña atu kompriende problema ne’e, koalia ho ema barak kona-ba ekonomia atu ita aprende, ne’e papel lider. Hatene kontaktu ema para rona.” hateten, Horta.
Nune’e Horta konsidera presiza haree desizaun kona-ba ekonomia no bainhira nia eleitu sai Prezidente Republika sei tun koalia no diskute ho lider sira hotu atu hodi haree asuntu ekonomia, tanba dadaun ne’e ekonomia sai ameasa boot.
Nia subliña Prezidente Republika hakle’an unidade, hametin Estadu de direitu, hametin demokrasia, buat ne’ebé halo tuir konstituisaun.
