Reportajen David da Costa Gusmao
Iha komemorasaun Loron Balibo Five ba dala-47, Asosiasaun Jornalista Timor-Leste (AJTL), husu ba governu atu respeita serbisu jornalista nian, no labele kriminaliza serbisu jornalista nian. Tanba jornalista iha papel importante hodi sai ponte entre povu ho estadu.
Prezidente Asosiasaun Jornalista Timor-Leste (AJTL) Zevonia Veira, hateten iha komemorasaun ida ne’e AJTL kontinua husu ba estadu , governu , partidu politiku no instituisaun importante sira seluk hodi kontinua respeita serbisu jornalista nian , labele kriminaliza serbisu jornalista nian, hodi uza kódigu penal tanba jornalista iha papél importante, hodi sai ponte entre povu ho estadu, hodi informa informasaun sira ne’ebe povu sira hakarak hato’o , no sai Kontrolu sosiál iha sosiedade nia leet.
“Husu ba governu atu respeita serbisu jornalista nian, no labele kriminaliza serbisu jornalista nian,” Prezidente AJTL Zevonia husu ba estadu liuhosi Konferensia Imprensia Iha Balibo Vila, Domingo 16/10.
Nune’e mós AJTL husu ba Ministériu Asuntu Parlamentár no Komunikasaun Sosial (MAPKOMS) hodi dada hikas kazu jornalista nian iha Tribunal, tanba jornalista laos kriminozu labele uza podér hodi hamate liberdade imprensa.
Nia haktuir relasiona ho ezbosu lei sibernétika ne’ebé dadauk ne’e iha hela Parlamentu Nasional, AJTL husu atu halo diskusaun públiku involve jornalista , akademista no sosiedade sivil sira atu fó sira nia hanoin, nune’e laiha artigu ida ne’ebé bele impede serbisu jornalista, sosiedade sivíl no akademista nian iha dijitál , no sekarik lei ne’e aprova mós tenke proteje ema hotu nia direitu , laos politiku nain sira nian direitu deit.
“Ohin loron ita moris iha era dijitál husu mós ba jornalista sira atu uza dijitál ho responsabilidade hodi kontra liafuan odiu, rasizmu no informasaun falsu nune’e ita la halo ema vulneravel atu sai vulneravel liután, kontinua kumpre kódigu étika jurnalistiku no prinsípiu jurnalisu, tanba sai nu’udar ukun fuan jornalista nian,” nia esplika.
AJTL mós husu ba Konsellu Imprensa (KI) kontinua sosializa lei komunikasaun sosial , no importansia husi serbisu jornalista nian ba públiku, nune’e liberdade imprensa kontinua eziste ho di’ak.
Iha komemorasaun ba loron Balibo Five ba dala-47 ne’e, Asosiasaun Jornalista Timor-Leste (AJTL), liuhosi konferensia imorensa hato’o parabens ba jornista hotu no media, tanba loron ohin nu’udar loron dahulul nia ba komemorasaun loron nasional liberdade imorensa iha Balibo.
“AJTL hakarak fo parabéns ba jornalista hotu, no media tanba ohin loron nu’udar loron dahuluk nian ita komemora loron nasional liberdade imprensa iha Balibo, nu’udar fatin trajédia ne’ebe militár Indonesia ohin jornalista estranjeiru nain 5 , nune’e bolu ho naran Balibo Five,” Prezidnete AJTL fo Parabens ba jornalista sira hotu.
Nia haktuir, liuhusi diskusaun naruk hamutuk ho Konsellu Imprensa hodi deside loron 16 Outubru sai nu’udar loron nasional ba liberdade imprensa. Liuhosi komemorasaun ne’e AJTL kontinua hato’o nia pozisaun katak hahú husi harii AJTL iha 22 Dezembru 1999 to’o ohin loron, AJTL kontinua firme hodi promove liberdade imprensa no espresaun iha Timor-Leste, tanba ida ne’e mak sai baze fundamental husi direitu umanus.
AJTL orgullu tanba relatóriu husi Report Without Borders, Timor-Leste nia liberdade imprensa kontinua hatudu ezemplu diak iha sudeste aziátiku ho rangking 1 no iha mundu global kontinua hakat ba rangking 17.
Asosiasaun Jornalista Timor Lorosa’e ( AJTL ) nu’udar asosiasaun ne’ebé sai nu’udar mahon ba jornalista sira, hodi haree liu kona-ba liberdade imprensa no espresaun, nomóss kapasita jornalista sira kona-ba jurnalismu.
Asosiasaun ne’e hanaran Asosiasaun Jornalista Timor Lorosa’e, iha Hotel Turismo. AJTL harii bazeia ba Deklarasaun Turismo ne’ebé asina husí jornalista na’in 60 iha loron 22 Dezembru 1999 , Dili Timor Lorosa’e.
