Reportajen Adroaldo “Saretukua”
Sekretáriu Jeral Partidu Movimentu Libertasaun ba Povu Maubere (MLPM), Jose Domingos Martins “Belak”, hatete MLPM nia programa prioridade wainhira hetan fiar hosi povu mak fo subsídiu ba estudante, juventude, agrikultor no povu Maubere tomak hodi apoiu sira halo sira nia aktividade estudu, kreatividade no agrikultura.
“Atu halakon kiak ne’e, primeiru ita fo uluk subsídiu, subsídiu ne’e ba juventude sira, estudante sira, povu aileba sira ne’ebé durante ne’e agora terus ne’e, MLPM hakarak atu halakon tiha kiak ne’e, entaun fo uluk subsídiu ba estudante sira, sira hosi pre-primária ita fo $15 pur mes, depois pre-sekundária $30 pur mes, iha universidade ita fo $50 pur mes, atu sira nia sustentabilidade estudante ne’e, estuda ba futuru.” Dehan Sekretáriu Jeral MLPM ba Neon Metin iha Salaun Delta-Nova, kuarta-feira, 26/04.
Seluk mak fo subsídiu ba juventude sira hodi halo aktividade kreativu sira, hodi labele halakon talentu ne’ebé mak sira iha, nomos ba povu aileba sira ne’ebé iha kiak nia laran MLPM nia planu atu fo subsídiu mínimu $50 pur mes, hodi rekopera sira nia ekonomia.
“La’os subsídiu ne’e ita fo hotu mais ita fo mos mikro-kréditu ruma ba sira, kuantu orsida susesu ni-nia subsídiu sira ne’e ita hamate. Pois ita kria ona kampu de traballu ne’e mak importante. Governu re-ativa de’it setor privadu, setor koperativa, setor públiku sira ne’e ruma ou empreza públiku sira ne’e.”
Nia hatutan, fo mos subsídiu ba ita nia agrikultor sira hodi sira bele produs ita nia hahan iha ita nia rai rasik. Iha parte sorin, MLPM hakarak produs eskola no formasaun ho kualidade ba juventude sira hodi bele kompete iha merkadu laboral.
