Reportajen Silvino Freitas
Relasiona ho insidente ne’ebé akontese iha area Lurumata órseik 13/05, hodi hamate joven ida ne’ebé deskonfia husi membru artemarsial Persaudaraan Setia Hato Terate (PSHT) no Federasaun Wushu nia membru ida mak sai supeitu, maibé husi parte PSHT no Federasaun Wuhsu deklara la’ós problema entre Wushu ho PSHT, nune’e entrega kazu ba parte relevante hodi hala’o investigasaun.
Nune’e Komisaun Reguladora Arte Marsiais (KRAM), urjentemente bolu ona líder organizasaun arte marsial PSHT ho Federasaun Wushu, hodi husu klarifikasaun ba insidente refere no parte rua aseita malu katak insidente ne’ebe akontese la’ós problema PSHT Wushu, maibé PSHT konfirma katak loos duni membru ida ne’ebe sai vitíma mai hosi PSHT no Wushu rona katak parte suspeitu nain ida membru Wushu.
“PSHT ho Wushu seidauk bele estabelese kronolojia ida klaru no seidauk bele hetan motivasaun loloos husi insidente ne’e maibé iha diskusaun entre parte rua, aseita katak insidente ne’e involve duni membru husi PSHT no nain ida hosi Wushu no tantu husi vitíma no suspeitu la hetan orientasaun husi organizasaun no nunka haruka nia membru sira halo violénsia” haktuir komunikadu ne’ebé Neon-Metin asesu, (14/05).
Nune’e, husi parte rua husu atu membru hotu kontinua hakmatek hodi tau interese estadu nian no interese organizasaun nian boot liu interese pesoal, kontinua husu membru sira, karik involve iha asidente horseik, atu hatudu sira nia responsabilidade ba nasaun hodi mantein situasaun hakmatek durante eleisaun.
“Husi parte KRAM kontinua komunika ho arte marsial hotu-hotu hodi kontinua bolu atensaun ba nia membru sira atu labele monu ba provokasaun no labele provokadu ho tentativas oioin mak bele estraga naran dak organizasaun nian, PSHT no Wushu halo ona klarifikasaun ba insidente violénsia akontese órseik iha Lurumata, parte rua aseita atu husik kazu nee ba PNTL halo investigasaun no establese faktu loloos hodi bele lori justisa ba vitíma nomós nia família” haktuir komunikadu husi KRAM.
