Reportajen David da Costa
Ohin Tribunál Primeiru Instánsia Dili kontinua halo primeiru interogatóriu ba Reitór Universidade Nasionál Timor-Leste (UNTL) João Soares Martins mos inklui kargu Xefia na’in lima seluk. Maibé ikus mai Tribunál liberta arguida na’in neen, tanba prazu ba detensaun arguidu sira remata ona.
No iha primeiru Interogatóriu ne’e, Ministeriu Públiku ne’ebé reprezenta husi Prokuradór Matias Soares Promove ho Krime Abuzu Poder, Administrasaun danoza, Pekulatu no falsifikasaun dokumentu ba arguidu na’in neen sira maka hanesan, Retór UNTL João Soares Martins, arguidu FQdC , TS nu’udar atuál dekanu UNTL no arguidu MB nu’udar eis dekanu iha UNTL no mós arguida JMM no LSdA.
Tanba ne’e, durante primeiru interogatóriu ne’e arguidu na’in lima sira hili direitu ko’alia nune’e prosesu primeiru Interogatóriu ba arguidu la’o kleur. Iha prosesu Primeiru interogatóriu ne’e iha alegasaun Prokuradór Matias Soares solita ba Tribunál atu aplika medida koasaun Proibisaun Auzénsia no Apreensaun Peridika ba arguidu Retór UNTL Joao Martins inklui atuál dekanu na’in rua FQdC no TS.
Enkuantu eis-dekanu ho inisiál MB no arguida ho inisiál JMM no LSdA Ministeriu Públiku husu ba Tribunál atu aplika medida koasaun Aprezentasaun Periodika no Termu Identidade Rezisténsia (TIR). Maibé iha primeiru interogatóriu defeza husi Arguidu na’in neen solisita ba Tribunál atu aplika de’it medida koasaun TIR.
Hafoin Tribunál liuhusi Juiz Titulár Argentino Nunes, rona tiha parte hotu iha alegsaun deside liberta kedan arguidu na’in neen, tanba prazu ba detensaun arguidu sira remata ona.Tanba ne’e maka Tribunál deside liberta sira.
Iha primeiru Interogatóriu, Defeza Arguidu sira Advogadu Privadu Cancio Freitas, hateten, iha alegasaun Defeza sira husu TIR tanba defeza konsidera Termu Identidade Rezisténsia ne’e medida ne’ebé ki’ik husi media koasaun sira ne’ebé iha.
Tanba iha alegsaun Ministeriu Públiku husu ba Tribunál atu aplika medida koasaun Proibisaun Auzénsia no medida koasaun Aprezentasaun Periodika ba arguidu nain neen.
“Ha’u husu TIR de’it, maibé Ministeriu Públiku Aprezenta Periodika ha’u admite tanba krime ne’ebé Ministeriu Publiku promove mai Tribunál ne’e jerál de’it la justifika, iha arguidu sira deklarasaun mós laiha indisiu forte ba prejuizu ka prosesu ne’e la gasta osan”, Cancio hateten ba jornalista sira iha Tribunál Judisiál Primeira Instánsia Dili Kaikoli, Sexta 16/01.
Entertantu Juiz Argentino Nunes ensera primeiru interogatóriu ba arguidu Reitór Universidade Nasionál Timor Lorosa’e (UNTL) João Soares Martins ho arguidu nain lima seluk liberta, no arguidu sira bele fila ba ida-idak nia uma.
Nune’e Tribunál deside aban mak foin hasai despaisu ba primeiru interogatoriu ba iha arguidu na’in neen.
Prosesu ne’e, prezide husi Juiz turnu Arjentino Nunes, Ministeriu Publiku reprezenta husi Prokurador Matias Soraes, no arguidu na’in neen hetan asistensia legál husi Advogadu Privadu no Defensor Publiku.
Rekorda katak Polisia Nasional Timor-Leste (PNTL), liu-husi Diresaun Servisu Investigasaun Kriminal Nasional ezekuta mandadu Tribunál Judisiál Primeira Instansia Dili (TJPID) ho NUC 086/25-PNSIK hodi halo buska, apreensaun no detensaun ba Reitór Universidade Nasionál Timor Lorosa’e (UNTL) João Soares Martins no kargu xefia na’in lima.
Diresaun Servisu Investigasaun Kriminal Nasional ezekuta mandadu Judisiál hodi halo buska, apreensaun no detensaun ne’e, relasiona ho violasaun balu ne’ebe akontese iha tinan 2024.
