Reportajen Adroaldo “Saretukau”
Chevening nu’udar Programa Bolsa Mestradu hosi governu Reinu Unidu nian ne’ebé permite bolseiru selesionadu sira hodi halo estudu iha nasaun sira Reinu Unidu nian, Inglaterra, Wales, Scotlandia no Norte Irlándia, ho finansiamentu total (fully funded) hosi governu Reinu Unidu.
Harry Stockwell, Xefe Bolsa Chevening mai Timor-Leste no Indonézia, hamutuk ho nia Belun Vonny, foin dadauk mai iha Timor-Leste atu halo entrevista ba kandidatu Bolsa Chevening ne’ebé aplika iha tinan 2025. Iha Timoroaon lubuk ida mak aplika liu-liu aplikante interesadu iha área, Saúde, Negósiu, Jestaun Bee no Aviasaun.
Alein de ne’e, sira mos mai promove Bolsa Chevening liu hosi ko’alia ho media sira, Ministériu balun nomos kompañya balun.
“Chevening mak governu Reinu Unidu nia programa Bolsa Mestradu. Buat ne’ebé ami buka mak futuru lider. Ami buka ema ne’ebé iha paisaun ba seitor sira no área estudu ba komunidade sira, ba hirak ne’ebé hakarak halo mudansa ba Timor-Leste.” Dehan, Xefe Bolsa Chevening, Harry, iha Otél, Palm Springs, Fatuhada, Dili, 18/03.
Nia esperansa ho Bolsa ne’e bolseiru sira bele aumenta sira-nia abilidade, relasaun global.
“Sira bele fila mai Timor-Leste bele rezolve problema ne’ebé iha, bele iha saúde, mudansa klimátika ka dezenvolvimentu sustentável ka área ne’ebé sira aplika ba.” Dehan Harry.
Aplikasaun ba Bolsa Chevening hahú loke iha fulan Agostu kada tinan, Xefe Bolsa Chevening ne’e enkoraja Timoroan ne’ebé iha interese atu hala’o estudu iha Reinu Unidu, bele prepara aan, hanoin konabá área ne’ebé sira hakarak estuda, bele ko’alia ho alumni ruma atu fo mentoring hodi hahú prepara sira-nia aplikasaun. Kada tinan sira fo Bolsa ne’e ba Timoroan entre na’in 2 to’o 3.
Bolsa ne’e, ho finansiamentu total (fully funded) hosi governu Reinu Unidu, hosi vistu, viajen, hela fatin, saúde to’o eskola remata no fila mai Timor.
“Ami mos fo osan viajen kada tinan ba viajen iha Reinu Unidu atu hasoru no halo ligasaun ho bolsa Chevening sira seluk.” Nia dehan.
Bolseiru sira mai hosi nasaun 140 iha mundu tomak ho total mais ou menus 1400. Ho númeru ne’e, bolseiru sira iha komunidade ida ho koneksaun global, nia hatutan tan.
Alumna Bolsa Chevening, Doutora Elfiana de Fatima Amaral, hetan Bolsa refere iha tinan 2023 hodi hala’o nia estudu Mestradu iha nasaun Inglaterra iha área Medisina Tropikana.
Nia dehan, Bolsu estudu Chevening ne’e, fundus hosi governu Reinu Unidu (UK), ne’ebé mak estudante sira tenki ba estuda iha nasaun sira Reinu Unidu nian, bele ba iha Inglaterra, Scotlandia, Wales, Norte Irlándia.
“Momentu ne’eba ha’u aplika no ha’u ba eskola iha London School of Hygiene Tropical Medicine, ha’u foti Mestradu iha Tropical Medicine and International Health no iha ne’eba sira-nia Mestradu ne’e tinan ida de’it.” Nia esplika ba Neon Metin iha Otél Palm Springs, 18/03.
Doutora Elfi nu’udar mos Dosente iha Universidade UCT hatete, buat di’ak ne’ebé nia sente mak hasoru bolseiru hanesan hosi nasaun seluk. Iha nia klase laran nia iha kolega Bolsa Chevening hosi nasaun Panama, Taiwan, Mexico nomos nasaun Áfrika sira.
“To’o ohin loron ami sei kontaktu nafatin sira ne’e maske ami eskola hotu ona no hela fatin keta-ketak. Entaun liu hosi bolsu estudu ida-ne’e la’os ba estuda de’it iha UK maibé ita mos forma koneksaun ne’ebé mak luan.” Nia dehan.
Oras ne’e da-dauk, Doutora Elfiana haknaar aan nu’udar dosente iha Universidade Católica Timorense (UCT). Antes ne’e, nu’udar Diretora Programa no Asesór Kliniku ba Moras Hada’et nian iha Asosiasaun Maluk Timor.
Bolsa Chevening hahú iha Timor-Leste tinan 42 liubá uanhira Timor-Leste sei parte hosi Indonézia. Oras ne’e total hamutuk ona alumni 50 kompostu hosi feto 25 no mane 25. Alumni barak mak kontribui ona iha parte organizasaun privada no governu. Entre hirak ne’e balu sai Ministru, Embaixador no seluk tan.
