Reportajen David da Costa
Governu liu husi Ministru Justisa (MJ), submete ona lista komutasaun pena no indultu ba Prezidente Repúblika (PR) José Ramos-Horta, hamutuk ema besik haat nulu (40), no eis padre Richard Daschbach mos tama iha lista refere.
Ministru Justisa, Sérgio Hornai, hateten, Governu submete ona lista komutasaun pena no indultu hamutuk ema besik haat nulu no inklui mos eis padre Richard Daschbach ba Prezidente Repúblika no sei hola desizaun tuir kompeténsia iha loron nasionál sira hanesan selebra loron 20 Maiu no seluk tan.
“Ita halo dadaun por volta besik haat nulu probilidade ita hato’o ona hein katak iha situsaun rua ida mak indultu ida mak komutasaun pena, hau la lori lista iha ne’e o que sertu ita halo ona submisaun ba iha Prezidente Repúblika,” dehan Sérgio Hornai, ba jornalsita sira iha palásiu Governu, kuarta 13/05.
Governante ne’e haktuir, iha tinan kotuk mos hato’o ona, agora sira ne’ebé seidauk, hetan diretu ba komutasaun pena nomós indultu ninian.
“Ita halo resubmisaun, bazeia ba proposta sira ne’ebé mai husi benfisiáriu sira, tantu sira nia família, sira nia reprezentante ka mai husi sira nia korpu diplomatik sira ne’ebé karik estrajeiru karik iha, em prinsipiu ita fó hela ba iha sidadaun sira ne’ebé iha prizaun, se Prezidente haree katak ida ne’e oportunu bele fó mos komutasaun pena nomós indultu,” nia esplika.
Nia salienta, husu lista ne’e mai husi ema sira ne’ebé haree husi pontu de vista servisu prizionais ninian katak merese atu hetan komutasaun pena no indultu.
“Tanba kondenadu sira komportamentu di’ak, kolobora di’ak hatudu sira nia komportamentu, seluk hanesan ninia idade avansadu ona ita la iha pena perfeitua iha ne’eba ne’e, entaun hau hanoin ita boot sira halo ezersisiu oinsa atu bele paixaun ida umanitaria, se ema idade fó biban ba nia atu bele hamutuk ho nia família,” nia afirma.
Nia subliña, iha lista ne’e mos inklui eis padre Richard Daschbach tanba nia mos ema ne’ebé idade ona governu hato’o hela informasaun ne’e ba hela, orsida mak kompetesia propria iha Prezidente Repúblika nian atu tetu.
“Mais gurda prizionais tetu ona no halo tanba iha lei ezekusaun pena nian ne’ebé mak prizaun atu ezerse nia funsaun liuhusi ministériu justisa, lista podeser inklui eis padre Richard Daschbach, em prinsipiu tanba nia mos idade avansadu tama hotu lista ne’e,” nia konklui.
