Home Meio Ambiente Jestaun Lixu Ladiak, Komunidade Soe Foer ba Mota

Jestaun Lixu Ladiak, Komunidade Soe Foer ba Mota

172
0
Lixu iha esgotu laran (Foto: Dili Weekly)

Reportajen Adroaldo ‘Saretukau’

Aldeia La’o rai, Karegatiro, Suco Kulu-Hun, iha ona dalan ne’ebé maiz ou menus di’ak maibé la iha lixu fatin iha Bairu Karegatiru nia laran. Nune’e komunidade barak soe nafatin fo’er iha mota laran tanba fatin soe lixu ho distánsia ne’ebé dook tebes. Komunidade balun iha konsiénsia hodi la soe fo’er iha mota laran.

Membru comunidade Aldeia, La’o rai, Karegatiro, Suco Kulu-Hun, Regina Correia haktuir kona ba problema lixu iha sira nia hela fatin.

“Iha bairu ida ne’e seidauk iha lixu fatin, governu la kria. Uluk liu iha lixu fatin rua maiz ou menus iha tinan 2007 no 2008 maibé komunidade sira soe tiha lixu ema la mai foti no ema la mai tula. Tanba fo’er dois rai na’in taka tiha lixu fatin. Governu la haruka kareta mai foti mak ema komunidade taka tiha, tanba fatin dois. Governu kria tiha lixu fatin maibé la mai foti lixu. Depois lixu ne’e tamun fali ema komunidade, entaun komunidade hamriik taka tiha,” Regina haktuir hosi nia hela fatin Karegatiru, loron 11/03.

Rejina mos hatete katak, “hahú Janeiru mai to’o Marsu ami komunidade rasik organiza malu ami implementa ami nia hakarak mak soe lixu iha lixu fatin estrada boot, ema hodi tula iha estrada boot. Ida ne’e ami rasik, ami nia ideia, hodi soe fo’er iha estrada boot. Nunka Xefe Aldeia ka Xefe Suku ko’alia atu soe fo’er iha nia fatin. Komunidade rasik mak hasai nia ideia halo limpeza ba tau lixu iha lixu fatin ne’ebé iha estrada boot, la iha avizu hosi Xefe Aldeia ka Xefe Suku.”

Lian hanesan hato’o hosi membro comunidade seluk, Mario Gusmão, nia orgniza ona família atu la soe foer ba mota.

“Durante ne’e sira ba so’e fo’er iha lixeiru ne’ebé dook tanba sira nia aldeia ka bairu la iha lixeiru. Fatin lixu mak la iha, ida ne’e mak kestaun. Mas iha ha’u nia família ha’u halo ona, ha’u prevene labele soe fo’er tan iha mota,” Mario hato’o.

Mario mos dehan katak kestaun ida mak lixu fatin besik la iha, kestaun seluk maka transporte ne’ebé mak mobiliza tama to’o iha aldeia ne’e rasik mós la iha hodi tula komunidade sira nia lixu, kareta la mai to’o iha ne’e. Entaun ema soe iha dalan ibun, loron to’o semana, butuk nafatin hanesan ne’ebá tanba transporte la tama mai iha ne’e. Ne’e duni importante tebes kria lixu fatin iha dalan ibun sira ne’e, para komunidade duke soe fo’er iha mota, di’ak liu soe iha fatin lixu ne’e.

Xéfe Aldeia La’o Rai, Caregatiro, Suco Kulu-Hun, Roberto da Costa Xavier hatete katak lixu fatin kik no lixu fatin halo iha ema nia rai depois rai nain sobu tiha. Komunidade mos soe foer ba mota iha tempu kalan nune’e ema seluk la haree.

“Uluk lixu fatin iha fatin tolu, tanba ema nia rai ne’e privadu, rai komunidade nian maka oferese ba estadu hodi tau lixu fatin, maibé hotu-hotu la preokupa hodi fo’er ba tau iha ne’ebá, lixu fatin mamuk hela de’it, komundade sira ba so’e iha mota de’it. Tanba ida ne’e maka rai na’in foti tiha lixu fatin baku rahun no sira fa’an tiha rai ba ema hodi halo uma,” Roberto hatete.

Roberto mos dehan katak iha komunidade balun ita ko’alia sira ba tau, maibé iha Komunidade balun, sira aproveita tempu kalan hodi soe fo’er ba iha mota laran, difisil atu kontrola.

Maibe Roberto hatutan dehan, “Ikus-ikus ne’e ha’u haree kapás tanba, fo’er komesa menus liu ona, tanba la hanesan uluk, uluk ne’e iha mota laran nakonu, tanba komesa lei ida fo sai ona katak labele soe fo’er arbiru, maibé dala ruma sira soe ne’e ho tempu kalan.”

Tuir observasaun, komunidade sira soe fo’er ho distánsia ne’ebé dook tebes duni husi Aldeia La’o Rai parte kraik nian ka ninin hosi aldeia ne’e nian, komunidade ne’ebé hela iha leten ho distánsia ne’ebé besik estrada boot Becusse nain no koko ba soe iha lixeiru iha dalan boot Becusse nian ho sira nia karosa no balun hulan ho karon. No sira sira seluk ne’ebé dook sei fakar nafatin fo’er iha mota aldeia La’o rai, Karegatiru nian no wainhira udan tau fo’er sira ne’e mota lori tun hotu ba tasi, iha parte tasi Ibun ponte foun Bidau nian.

LEAVE A REPLY

Please enter your comment!
Please enter your name here