Home Notisia TLDG Organiza Webinar, COVID Fo Impaktu Ba Feto Sira Sai Vulneravel Liutan

TLDG Organiza Webinar, COVID Fo Impaktu Ba Feto Sira Sai Vulneravel Liutan

892
0
webinar. [Foto: Adroaldo | 22.05.2021]

Reportajen Adroaldo ‘Saretukau’

Timor-Leste Debating Group (TLDG) organiza semináriu virtual ba membru TLDG, juventude no estudante universitáriu sira liu hosi ZOOM konabá impaktu hosi surtu COVID-19, liu-liu oinsá afeta ba feto sira durante situasaun Estadu Emerjénsia (EE), ne’ebé aprezenta hosi Ofisial Programa NABILAN Fundasaun Azia nian. Programa NABILAN rasik hanesan programa ida ne’ebé foka ba asuntu sira ne’ebé defende tipu violénsia sira kontra feto iha Timor-Leste.

Iha aprezentasau liu hosi virtual zoom, Ofisial Programa NABILAN, Rosa Cardoso hateten COVID-19 fo impaktu boot tebes ba feto sira, liu-liu iha situasaun Estadu Emerjénsia (EE) 

“Iha aktiividade ne’ebé buka osan ne’e la fasil, ho COVID-19 ema hotu sei iha uma, entaun ne’e hasa’e liu sira (feto) nia vulnerabilidade atu asesu ka hetan osa. Ida ne’e la’os ba ema ho difisiénsia de’it, inklui ba iha labarik feto no inan sira hanesan Single Parent, nomos inan sira ne’ebé nafatin iha relasaun maibé sira nia rendimentu menus tebes, entaun ida ne’e risku tebes ba iha situasaun hasoru COVID-19 ne’e”, hateten Oficial Programa NABILAN Rosa, 22/05.

Nia hatutan katak ho COVID-19 no EE hamenus feto nia ekonomia uma laran, no mos sira nia asesu ba ai-han, ba sira ne’ebé ho esforsu sustenta rasik sira nia família uma laran.

“Ho COVID-19 ne’e difisil tebes atu asesu ai-han hanesan ita hotu hatene, no liu-liu tan mos hanesan feto sira ne’ebé desidi divórsiu ka Single Parent, ne’ebé mak karik nia haree nia oan na’in lima ka neen. Ho Estadu Emerjénsia ne’e mos risku tebes ba sira atu aumenta sira nia vulnerabilidade, liu-liu asesu ba iha ekonomia, no mos atu hetan ai-han ne’ebé naton ba sira nia família”, Rosa hatutan.

Nia hateten katak COVID-19 ne’e nia impaktu ba ema hotu, maibé tanba sá feto sira mak barak liu? tanba COVID-19 aumenta violénsia kontra feto. Nia hateten antes iha 2015 sira halo peskiza ida hatudu katak feto ho 59% sai vítima barak liu ba iha violénsia hosi sira nia parseiru íntimu. Feto ne’ebé hela iha situasaun violentu nia laran ka hetan tratamentu ne’ebé ladi’ak hosi nia parseiru hanesan insulta, tolok, baku nomos violasaun seksual, ida ne’e halo nia moris hetan stress.

“Maibé ida ne’e la’os abut hosi violénsia, ida ne’e hanesan fator ida ne’ebé kontribui atu violénsia ne’e aumenta, tanba ita hotu hatene katak abut loloos hosi violénsia ne’e mak la’os stress, la’os hanesan ekonomia maibé abut loloos ne’e mak Gender Inequality ka la iha balansu kbiit entre feto ho mane”, hateten Rosa.

Ho situasaun EE feto barak mak susar atu hato’o sira nia problema iha autoridade ka organizasaun ne’ebé ne’ebé tau matan ba feto sira, tanba ho movimentu ne’ebé paradu halo sira labele ba hato’o keixa. Susar mos ba feto sira ne’ebé hetan violénsia atu curhat sira nia problema ba sira nia belun ne’ebé besik, tanba tenki hela iha uma de’it.

Iha parte sorin Prezidente TLDG, Leónia L. Freitas hateten objetivu hosi semináriu ida ne’e mak atu hasa’e koñesimentu joven konabá issue ne’ebé akontese iha rai laran, nune’e sira bele fó krítiku ne’ebé konstrutivu ba problema ne’ebé iha.

“Inisiativa atu fó oportunidade ba joven sira atu espresa sira nia ideia ne’ebé mak sira iha, ho hanoin krítiku liu hosi debate mak iha. Entaun issue ne’ebé mak ita ko’alia ohin loron nian la ses hosi misaun TLDG nian. Tanba hanesan joven, hakarak atu espresa sira nia hanoin krítiku no ideia konabá issue ruma, primeiru sira tenki hatene uluk issue importante ne’ebé mak agora da-dauk akontese iha ita nia rain no impaktu ba ita nia ema sira,” hateten Prezidente TLDG Leónia, via whatsapp, 22/05.

Nia hatutan intesaun atu fahe mos informasaun hodi aumenta koñesimentu ba joven sira ne’ebé menus informasaun, liu-liu hatene oinsá feto sira ne’ebé enfrenta dezafiu iha Pandemia COVID-19 nia laran.

TLDG hakarak atu fahe informasaun ida ne’e, tanba tinan kotuk liubá TLDG organiza debate ho topiku balun konabá issue COVID-19, oinsá governu rezolve COVID-19. Fahe informasaun ba joven sira ne’ebé mai ho hanoin krítiku no ba sira ne’ebé hakarak sai futuru lideransa, no hasa’e kapasidade lideransa primeiru tenki iha konesimentu ba issue ruma molok atu hanoin krítiku no debate.

Print Friendly, PDF & Email

LEAVE A REPLY

Please enter your comment!
Please enter your name here