Reportajen Santina Lucia da Costa
Relasiona ho udan boot ne’ebé akontese iha loron 21 Fevereiru, hamosu inundasaun iha Mota Comoro, nune’e fo kauza ba inan Isin rua Celeste de Jesus Barreto (30) ne’ebé hela iha Fomento II la konsege salva sasán iha uma laran.
Ba Neon metin Celeste hateten, udan boot mota tun iha oras tuku 15:00 lokraik, bee tama hotu uma laran, sasan hanesan uma laran nian la aproveita kedas.
“Ohin kalan ami hakat duni mai iha Sentru Evakuasaun Dom Bosco, tanba mota tun boot sobu ami nia uma, ami uma laran hamutuk na’in lima, ami la aproveita sasan, no ohin kalan ami to’o iha ne’e ho labarik na’in tolu feto 1 mane 2, agora dadaun bebe iha isin fulan 8.” Hateten, inan Isin rua, Celeste de Jesus Barreto, iha Sentru Evakusaun Dom Bosco, Comoro, 21./2.
“Hau nia katuas-oan agora daidaun nia sei iha fatin inundasaun hodi haree uma, agora kalan ida ne’e ho labarik toba iha rai mós la buat ida, ami pasiénsia sei tur hela, ami seidauk han buat ida.” Tenik, Celeste de Jesus Barreto.
Inan isin rua ne’e mós husu ba governu ajuda iha tempu emerjénsia tanba sasan barak mak la salva.
Tuir dadus Provizoriu, Familia Afeitadu uma kain hamutuk 52, Labarik 55 no inan isin rua na’in 2.
Observasaun Neon Metin iha Sentru Evakuasaun Dom Bosco Comoro, Ekipa Autoridade Munisipiu Dili no Sekretariu Estadu Protesaun Sivil (SEPS), hala’o ona interevensaun asaun hodi fahe lona, biti, ba familia afeitadu sira. No dadaun ne’e familia afeitadu sira nahe lona toba de’it iha bake leten, no sira mós seidauk hetan hahan.
