Reportajen David da Costa
Abertura kampaña, Partidu Frente Revolucionário Timor-Leste Independente (FRETILIN) komprometidu hakarak fila ba ukun hodi hadia Sistema edukasaun ne’ebé kualidade di’ak liu ba povu nia oan sira.
Prezidente Partidu FRETLIN, Fransisco Guterres Lu-Olo, hateten tinan 20 ona Timor-Leste restaura nia independénsia nune’e tuir loloos, ohin loron povu hetan ona moris di’ak maibé realidade hatudu povu nafatin terus, susar iha sira moris, povu sei nafatin falta osan ba sira hodi selu oan sira nia eskola hodi asesu ba edukasaun no falta ai-moruk hodi trata sira nia saúde.
“Tinan 20 la’ós uitoan, maibé liu tiha tinan 20 ita sei haree ita nia inan feton sira, ita nia maun no alin sira no emar sira sei dada oos nafatin, sei halerik ba buat oi-oin kona-ba sira nia moris ne’ebé mak sei mukit nafatin, aihan falta ba sira, osan falta ba sira hodi selu oan sira nia eskola. Ai-moruk laiha atu kura sira nia moras, ferik ho katuas mate iha hadak leten, iha sira nia uma okos, laiha posibilidade atu bele salva sira nia vida,” dehan Lu-Olo, iha abertura kampaña FRETILIN iha Postu Administrativu Vemase, Munisipiu Baucau, kuarta 19/04.
Tanba ne’e hakarak hateten ba kamarda sira, FRETILIN hakarak ba fali ukun, para atu hadia povu nia moris, “FRETILIN garante edukasaun ida ne’ebé maka kualidade di’ak ba ita nia oan, no ita nia be-oan sira ne’ebé maka oras ne’e daudauk eskola hela. Kualidade edukasaun ida katak ita nia oan sira tenke matenek liu ita, matenek liu ami sira ne’e Tanba ne’e, para kaer futuru rai ida ne’e ninia metin ba oin,”
Ho ida ne’e Prezidente Partidu FRETILIN, husu ba militante no simpatizante sira atu lori hikas fali Partidu FRETILIN ba ukun hodi hadi’a povu no nasaun ida ne’e, tanba ukun an tinan 20 resin ona, maibé povu nafatin halerik buat barak iha sira nia moris loro-loron.
Sekretáriu Jerál Partidu FRETILIN, Marí Alkatiri, hateten, tenke hadi’a sistema Edukasaun ne’ebé mak laiha kualidade, tenke halo teste ba professór sira no fó formasaun di’ak ba sira. Sira ne’ebé mak la hatene lalika hanorin. Tenke buka ema matenek hodi hanorin, atu fó oportunidade ba ema hotu hodi sai matenek.
Tanba eskola ida di’ak maka eskola ida ne’ebé hahú hosi baze to’o universidade, maibé pré-Eskolár ida to’o tinan hitu tenke iha tratamentu espesiál liu-liu iha área nutrisaun sira, tenke hetan hahán lorloron ho kualidade, hodi sira nia kakutak bele nakloke ba koñesementu.
Nune’e mos preokupa iha seitór saúde ne’ebé mak prodús doutór barak, maibé la kria kondisaun di’ak ba sira hodi hala’o serbisu, la iha ai-moruk atu kura ema moras sira, nune’e povu fó fiar ba partidu FRETILIN maka sei hadi’a sistema no kria kondisaun dignu ba pessoál saúde sira atu sistema ne’e bele funsiona nafatin.
Bainhira FRETILIN ukun sei hadi’a mós Governu ida di’ak hodi gasta osan oitoan maibé halo dezenvolvimentu barak la’ós Governu ida gasta osan barak, maibé la halo buat ida. Governu ida tenke halo jestaun ho rasionál, la’ós jestaun gasta osan de’it ne’e governu ne’ebé la serve ba ba povu, tanba ne’e FRETILIN tenke hamutuk ho nia aliadu sira hodi harii Governu ida di’ak no Governu funsiona hanesan isin ida de’it.
Entertantu FRETILIN kontinua tau prioridade ba bee-moos hodi kanaliza ba ema ida-di’ak nia uma. Tanba ne’e importante hodi hado’ok an hosi moras, laiha bee-moos no saneamentu, tanba laiha saneamentu labele hadook an hosi moras.
