Home Analisa Helen Hill, Buibere Estraordinária Ne’ebé Luta ba Timor-Leste no Mundu Ida Diak...

Helen Hill, Buibere Estraordinária Ne’ebé Luta ba Timor-Leste no Mundu Ida Diak Liu

2990
0
Hellen Hill. [Foto: Doc. Abel Boavida | 20/05/2024]

Hakerek nain Nuno Rodriguez Tchailoro, Peskizadór Independente

Oras mate nian besik ona. Molok iis kotu, Helen Mary Hill husu nia alin mane, Ian Hill, toka múzika “O O Timor, O Ha’u-nia Rai”,  hananu husi Ego Lemos, nia estudante mestradu iha Victoria University, ne’ebé nia admira tebes.  Helen Hill hakarak múzika ne’e mak akompaña nia, to’o nia iis kotu. Se mak Helen Mary Hill ne’ebé fó nia an tomak durante tinan-50 ba Timor-Leste?

Helen Mary Hill moris iha Australia, iha 22 Fevereiru 1945. Helen Hill  nu’udar estudante iha Monash University iha Melbourne ne’ebé ativu tebes iha movimentu estudantil.  Entre universidade sira iha Australia, Monash University nu’udar instituisaun ensinu superiór ida husi sira seluk ne’ebé nia estudante hetan radikalizasaun no universidade ‘red brick’  ka bloku mean dahuluk  Melbourne nian. Estudante sira halo debate kestaun polítika, teoria no prátika iha basement husi biblioteka universidade nian. Husi debate sira ne’e hamosu organizasaun estudantil rua ne’ebé radikál liu, Socialist Alliance no Monash Labor Club, ne’ebé luta hasoru kapitalizmu hodi harii sosiedade ida ne’ebé laiha esplorasaun husi ema ida ema seluk. Tuir Jill Jollife, Helen nia kolega estudante iha Monash University, iha nia autobiografia Run For Your Life, hateten katak Editór jornál universidade Lot’s Wife, Pete Steedman, nu’udar forsa boot ida ba radikalizasaun movimentu estudantil iha Monash University. Helen no Jill Jolliffe sai membru husi Monash Labor Club. Aleinde ne’e, Helen nu’udar fiar-na’in kristaun komprometidu ativu mós iha the Student Christian Movement ne’ebé mós sai radikál tanba espansaun universidade no funu Vietnam.  Husi nia envolvimentu iha movimentu estudantil Helen Hill hetan konxiénsia polítika atu luta hasoru injustisa sosiál, la’ós de’it iha Australia maibé iha mundu, liuliu ba país sira ne’ebé luta ba sira-nia libertasaun husi kolonizasaun. Helen Hill nu’udar internasionalista ida ne’ebé trata problema injustisa sosiál husi país seluk sai mós ninia problema no iha obrigasaun atu luta kontra injustisa iha mundu. 

Maski Timor Portugés nu’udar Australia nia viziñu ho nia sidade kapitál nia distánsia besik liu kompara ho país sira seluk, maibé kolónia ne’e nunka hetan atensaun husi Australianu sira. La’ós de’it husi nia povu en jerál, maibé mós husi nia ativista sira ne’ebé fó apoiu ba movimentu libertasaun nasionál la hatene kona-ba Timor Portugés. Ema estranjeiru sira ne’ebé vizita Timor Portugés iha dekada 1960 no inísiu 1970 sempre temi kona-ba auzénsia movimentu libertasaun nasionál organizadu hasoru kolonializmu. Helen Hill partisipa ativu tebes iha movimentu estudantil hodi fó apoiu ba luta libertasaun nasionál husi kolónia portugés iha Áfrika, maibé nia rasik lahatene kona-ba Timor Portugés.

Movimentu estudantil husi universidade oinoin iha Australia forte tebes. Movimentu estudantil kontra funu iha Vietnam sai forte liután hafoin Governu konservadór Robert Menzies husi Liberal Party ne’ebé ukun durante tinan-23 deklara suporta tropás Estadus Unidus iha Funu Vietnam.  Estudantes sira iha Melbourne, inklui husi Monash University halo kampaña makaas no buka meius oioin finansia National Liberation Front of South Vietnam. National Liberation Front of South Vietnam nu’udar movimentu ida ho ideolojia komunista luta atu duni sai militár Estadus Unidus  husi Vietnam Sul. Mobilizasaun ba forsa oinoin iha Australia, Helen Hill sai organizadór ida ba Moratorium Movement ne’ebé tenta atu unifika diverjénsia sira entre organizasaun oinoin hodi harii movimentu massa hasoru governu.

Biar Helen Hill ativa tebes ba kampaña movimentu libertasaun nasionál maibé nia rasik nunka hasoru ema husi país sira ne’ebé luta ba indepedénsia nasionál. Iha 1970 bainhira partisipa nu’udar delegada husi Australian Student Christian Movement iha UN World Youth Assembly iha Nova Iorke mak foin hasoru membru sira husi movimentu libertasaun nasionál, partikularmente husi Áfrika. Husi ne’e, Helen Hill hasoru malu ho membru sira husi movimentu libertasaun nasionál husi kolónias Portugés iha Áfrika.

Iha nia dalan fila ba Australia husi Nova Iorke, Helen Hill para iha Beirut hodi vizita kampu refujiadu Palestina iha Lebanon ne’ebé Israel duni husi sira-nia rai rasik. Vizita ne’e  kompletamente muda nia hanoin kona-ba Médiu Oriente. Helen vizita mós Chennai iha India, uluk ho naran Madras.  Helen hetan oportunidade halo estajiu iha Londres hodi serbisu ba ‘Europe-Africa Project’ finansia husi World Student Christian Federation. Ninia partisipasaun iha movimentu anti-apartheid iha Australia fó vantajen koñesimentu, liuliu kona-ba kolónia portugés iha Áfrika. Helen hasoru membru sira husi FRELIMO, PAIGC no movimentu libertasaun husi Angola vizita regularmente ba sira-nia edifísiu no prezente iha konferénsia estudante Europa-Áfrika iha Italia, Helen hasasin iha  artigu How Timor-Leste influenced my academic career: A response to the papers by Michael Leach and Clinton Fernandes. Iha nia entrevista ho Knua Halibur Memória Sahe, delegadu sira husi kolónia Portugés iha Áfrika husu ba Helen Hill:

“Helen, ita mai husi Australia, ita tenke hatene barak kona-ba Timor Portugés tanba besik iha imi nia odamatan sorin.”  Maibé Helen Hill hatan ba delegadu sira:

“Deskulpa, ema barak iha Australia lahatene, lahatene buat ida kona-ba Timor.” Maibé Helen promete ba sira katak bainhira fila ba Australia nia sei buka hatene kona-ba Timor Portugés no haruka informasaun ba sira, Helen hateten iha nia entrevista ho Knua Halibur Memória Sahe.

Helen ba Londres ho apoiu husi American Presbyterian tuir kursu antropolojia no istória ekonomia  Sudeste Asiátiku University of London iha School of Oriental and African Studies. Kursu ne’e atu hatene liu kona-ba país sira ne’ebé jeografikamente besik ho Australia. Iha sidade ne’e, liuhusi Association for Radical East Asian Studies (AREAS), Helen hasoru Carmel Budiarjo no John Taylor ne’ebé ikusmai suporta Timor-Leste nia luta ba independénsia no hakerek kona-ba Timor-Leste.  Bainhira Revolução dos Cravos akontese iha Portugal, Helen Hill iha hela Afrika, iha dalan atu fila ba Australia.

Helen hasai nia lisensiatura iha sosiolojia iha Monash University. Helen la kontinua direta ba foti mestradu hafoin remata nia lisensiatura. Helen hili sai ativista hodi suporta luta hasoru injustisa sosiál iha mundu. Foin iha 1974, Helen sai estudante mestradu iha Monash University tuir kursu inovativu husi Dr Herb Feith ho naran ‘Politic of the Third Word, ne’ebé tuir Helen kestaun barak husi kursu ne’e aprende ona iha Londres. Herb Feith husu ba Helen se nia atu hakerek nia teze mestradu. Helen hatan katak nia iha interese uitoan ba Timor Portugés. Haree ba Herb Feith nia seriedade no péritu ida kona-ba Indonézia ne’ebé  hakarak sai Helen nia supervizór, nia deside hakerek kona-ba prosesu tranzisaun Timor Portugés sai país ida independente.

Iha nia preparasaun atu mai Timor Portugés, Helen lee referénsia sira kona-ba Timor Portugés iha biblioteka Monash University.  Iha fulan Agostu 1974, Helen Hill simu telefonema husi Herb Feith informa katak Timoroan ida ne’ebé organiza husi Denis Freney husi Communist Party of Australia iha hela Melbourne no husu atu hasoru nia. Timoroan ne’ebé Helen hasoru iha hotel Lygon Street, Carlton mak José Ramos Horta.  Husi ne’e, Helen aprende kona-ba partidu polítiku sira ne’ebé moris hafoin Revolução dos Cravos, liuliu ASDT ne’ebé luta ba independénsia no prosesu deskolonizasaun lidera husi Movimento das Forças Armadas (MFA). Ramos Horta ejize Helen Hill atu vizita lalais Timor Portugés no promete kooperasaun ho ASDT no introdús ba partidu polítiku UDT, Apodeti, Igreja Katólika no administrasaun Portugés.  Iha tempu hanesan Denis Freney,  prepara delegasaun husi Australia hodi hatan konvite husi administrasaun vizita Timor Portugés. Denis Freney kontaktu Jill Jolliffe ne’ebé mós nu’udar estudante husi Monash University atu bele tama iha delegasaun ne’ebé mai vizita illa ne’e. Delegasaun fahe ba grupu rua.  Tama iha delegasaun ida mak membru Parlamentár Ken Fry, John Kerin, Senatór Gordon McInstosh, Richie Gunn, Neville Bonner no Arthur Gietzelt. Delegasaun seluk mak sindikalista Keith Wilson, Jim Roulston, John Birch husi Australian Council for Overseas Aid, reprezentante Aborijin Bill Williams no reprezentantes estudante husi Australia Union of Student mak Jill Jolliffe no Tim Rowse husi Adelaide University. Helen Hill la hola parte iha delegasaun ne’e, maibé nia mai Timor Portugés mesak ho objetivu halo peskiza ba nia teze mestradu.  

Impaktu husi Siklonu Tracy, Helen Hill labele semo liuhusi Darwin mai aeroportu Baucau, nia tenke semo ba Jakarta. Iha Jakarta nia hasoru malu ho jornalista George Junus Aditjondro, ne’ebé hatudu dumey kapa revista Tempo ho Ramos Horta nia oin ho nia títulu Anda Seorang Komunis? no entrevista ne’ebé halo iha Díli prontu ba imprisaun. Helen Hill to’o iha Timor Portugés iha fulan Janeiru 1975.

Ramos Horta mak introdús líder Vicente Reis ‘Sahe’ no António Carvarino ‘Mau-Lear’ ba Helen Hill.  Tuir Helen Hill, Sahe no Mau-Lear ne’ebé estuda iha Portugal sira-nia pensamentu radikál liu kompara ho sira ne’ebé hela iha Timor. Sahe no Mau-Lear iha ideia klaru kona-ba revolusaun no sosializmu ne’ebé atu harii iha Timor-Leste no lidera projetu polítiku sira. Projetu polítiku ida ne’ebé interesante tebes ba Helen Hill mak kampaña alfabetizasaun ne’ebé hala’o husi FRETILIN nia kuadru foin-sa’e ne’ebé dezeña tuir prinsípiu edukadór populár husi Brazil Paulo Freire, oinsá ninia ideias pratika iha kolónia ida ho númeru analfabetu aas liu.  Helen Hill rasik sai estudante Paulo Freire nian iha Jenebra, bainhira Helen hala’o estudu iha Europa. Paulo Freire mak edukadór husi Brazil ne’ebé luta ba edukasaun ba libertasaun, hodi kontra edukasaun ba domestikasaun. Koñesimentu kona-ba Paulo Freire halo Helen iha kuriozidade boot liután atu hatene no asiste métodu Paulo Freire iha prátika.

Iha fulan Marsu 1975, Helen Hill vizita programa alfabetizasaun ho métodu Paulo Freire iha Namuleço ne’ebé labele asesu ho karreta.  Helen sa’e kuda durante oras tolu ba Namuleço hodi hatene no observa pilotajen aula alfabetizasaun ho métodu Paulo Freire uza manual Rai Timor Rai Ita Nian, ne’ebé prepara iha Portugál molok estudante Timoroan fila mai Díli hafoin Revolução dos Cravos.

Helen Hill admira tebes ho FRETILIN nia kampaña alfabetizasaun ho métodu Paulo Freire nian. Alfabetizasaun hala’o iha lian Tetun ne’ebé tuir evidénsia sira hatudu ona katak estudante sei preparadu liu atu aprende dalen foun bainhira hahú aprende uluk ho sira-nia lian rasik.  Tuir Helen Hill katak iha paízes sira ne’ebé ko’alia ingles foin mak hahú buka hatene Paulo Freire nia pensamentu kona-ba edukasaun libertadora, maibé iha Timor implementa ona ninia métodu. Ne’e tanba Timoroan bele lee Paulo Freire nia artigu sira iha versaun orijinál iha portugés, maibé país ho dalen ingles sei hein nia tradusaun no livru too mak foin bele lee. Helen Hill konta nia interasaun ho Sahe no Mau-Lear:

“Ha’u lembra Sahe bainhira ami sa’e kuda atu haree programa alfabetizasaun. Ami ko’alia no ha’u lembra Mau Lear.  Ha’u lembra Sahe hasai deklarasaun ida kona-ba oinsá Timor-Leste atu sai país ida progresivu liu iha Ázia, bainhira independente sei sai progresivu liu iha Ázia.”

Hafoin fulan tolu iha Timor Portugés Helen fila ba Melbourne hodi prepara an di’akliu ho intensaun atu fila fali mai Timor hodi kontinua ninia peskiza. Helen tuir kursu intensivu Portugés iha LaTrobe University. Infelizmente ho invazaun Indonézia, hapara Helen atu kontinua ninia tópiku peskiza no fila mai Timor.

Helen husik nia kursu mestradu, nia ba Nova Iorke apoiu José Ramos Horta estabelese eskritóriu diplomátiku FRETILIN, no fó semináriu kona-ba Timor Portugés iha universidade sira iha Estadus Unidus. Helen fó apoiu ba José Ramos Horta durante fulan tolu hamutuk ho Davic Scott, Richard Tanter no Sue Roff  ne’ebé kampaña ba tempu naruk iha UN Special Committee on Decolonisation tuir livru biografia Herb Feith, From Vienna to Jogjakarta hakerek husi Jemma Purdey.   Tuir David Scoot, iha nia livru Last Flight Out of Dili, hateten katak iha Nova Iorke grupu lobby husi Indonézia ho nia aliadu sira halo esforsu boot atu hases kazu Timor-Leste husi ajende ONU nian. Eskritóriu Sekretáriu Jerál ONU nia sempre sai sujeitu ba presaun husi grupu lobby pro-Indonézian nian ne’ebé forte tebes.  Helen hamutuk ho nia kolega sira fó apoiu ba José Ramos Horta fó-sai informasaun kona-ba invazaun Indonézia iha ONU. Konsellu Seguransa ONU Rezolusaun kondena invazaun no ejize Indonézia dada-sai nia militár husi Timor-Leste.

Iha 1976, Helen hakerek booklet The Timor Story ne’ebé konsidera nu’udar obra akadémiku dahuluk kona-ba Timor-Leste nia luta ba independénsia no sai referénsia prinsipál ba movimentu solidariedade Internasionál. 

Invazaun Indonézia halo Helen tenke muda nia tópiku husi tranzisaun polítika iha Timor Portugés sai nasaun independente ba hakerek kona-ba FRETILIN atu hatene partidu revolusionáriu ne’e nia orijin, ideolojia no estratéjias iha luta libertasaun nasionál. Mudansa  tópiku ne’e liga direta ho nia koñesimentu teorétiku no prátiku kona-ba luta libertasaun nasionál ne’ebé Helen aprende husi movimentu estudantil no nia envolvimentu hodi fó apoiu ba luta libertasaun nasionál husi terseiru mundu. Revolusaun ne’ebé FRETILIN lidera ba libertasaun totál e kompleta nu’udar Helen Hill nia luta mós. Helen Hill no FRETILIN fahe vizaun hanesan kona-ba mundu ida ne’ebé sira hakarak harii. FRETILIN no Helen Hill ko’alia termu polítika hanesan no diskute referénsia teória no polítika hanesan, husi pensamentu Marx, Mao Tze Tung, Amilcar Cabral, Paulo Freire no korrente sira iha Marxizmu.  Helen remata nia teze iha 1978 ho teze Fretilin: The Origins, Ideologies and Strategies of Nationalist Movement in East Timor.  

Governu Australia ne’ebé formalmente rekoñese okupasaun illegal Indonésia iha Timor no aliadu prinsipál hodi kontra Timor-Leste nia luta ba independénsia, maski hetan presaun oinoin, Helen la hakiduk nem sentimetru ida ba kotuk, kontinua hakat ba oin no dedika an tomak ba Timor-Leste nia luta ba independénsia liuhusi  seminárius no artigus fanun komunidade internasionál ba povu Timor-Leste nia direitu ba auto-determinasaun.  Iha 1992, Helen hahú serbisu nu’udar dosente iha Victoria University. Hafoin Soeharto monu, iha fulan Abril 1999, Helen organiza konferénsia kona-ba Planu Dezenvolvimentu Estratéjiku Timor-Leste iha Victoria University.

Iha Indonézia, ativista Timoroan no Indonézia hamrook no buka atu revitaliza teoria no prátika libertasaun nasionál Timor-Leste nian.  Luta ba independénsia foka de’it ona duni-sai militár Indonézia sai husi Timor-Leste, libertasaun povu nia sai buat sekundáriu ida. Ho naran unidade nasionál bandu atu ko’alia libertasaun povu. Libertasaun povu so bele ko’alia de’it bainhira Timor-Leste hetan ona independénsia. Aumenta tan ho sistema edukasaun halakon istória luta libertasaun nasionál iha nia kurríkulu no troka ho versaun governu Soeharto nian katak integrasaun ba Indonézia nu’udar povu Timor nia vontade.  Husi sorin seluk, maski iha ona publikasaun barak kona-ba Timor-Leste nia luta, maibé barak liu foka ba violasaun direitus umanus no kona-ba FRETILIN nia programa polítika no sosiál  hakerek sorin-sorin de’it.  Husi ne’e, Sahe Study Club ne’ebé harii iha tinan 1998 nia rohan iha Jakarta hahú halo diskusaun kona-ba importánsia revitalizasaun teoria no prátika libertasaun nasionál. Helen Hill nia teze mestradu sai referénsia prinsipál atu bele kompriende kona-ba istória luta libertasaun nasionál tanba nu’udar obra akadémiku ne’ebé  autora rasik sai testamuña moris hodi  dokumenta prosesu revolusaun povu Maubere nian iha 1975. Helen nia teze nu’udar referénsia prinsipál atu kompriende luta libertasaun nasionál, membru Sahe Study Club deside halo tradusaun husi ingles ba indonézia iha 1999.  Livru publika ho títulu Gerakan Pembebasan Nasional Timor Lorosa’e publika iha 2000 ho apoiu finanseiru husi Yayasan HAK.

Livru ne’e distribui ba organizasaun sosiedade sivíl no entidade relevante sira iha Timor-Leste no faan iha loja livru iha Jakarta. Governu tranzisaun halo tradusaun fali husi versaun Indonézia nian ba ingles. Bainhira Helen Hill sama ain fali iha Díli iha 2000, nia kontente tebes tanba nia teze mestradu ne’ebé nia hakerek iha 1978, staff internasionál husi UNTAET sira sita nia obra. Publikasaun teze mestradu iha lian Indonézia dudu no fasilita publikasaun iha ingles iha 2002.

Publikasaun Helen nia livru iha lian Indonézia importante tanba loke ativista Indonézia no Timoroan nia koñesimentu ba  valores no prinsípius luta libertasaun nasionál Timor-Leste nian no ba jerasaun foun hodi kontinua kaer metin ba teoria no prátika luta libertasaun nasionál atu harii mundu ida ne’ebé nakonu ho justisa sosiál no igualdade sosiál.

Iha prosesu rekonstrusaun nasionál, Helen preokupa tebes ho sistema edukasaun ne’ebé Timor-Leste ne’ebé kontinua ho legadu koloniál, liuliu husi Indonézia nian. Iha nia artigu Pendidikan untuk Pembebasan atau untuk Penundukan di Timor-Leste yang Baru hateten katak sistema eskola portugés nu’udar sistema koloniál ne’ebé nia misaun mak atu hili grupu elite ki’ik oan no kria imajen kona-ba portugés, enkuantu garante katak barak husi estudante Timoroan sei falla. Iha diskusaun barak ne’ebé organizasaun sosieda sivíl hala’o ho nia, Helen sempre temi  sistema edukasaun ne’ebé Timor-Leste tenke dezenvolve bazeia ba realidade katak país ne’e illa ki’ik tanba ne’e presiza ema hotu-hotu nia kontribuisaun ba prosesu dezenvolvimentu. Helen halo nia krítika ba legadu sistema edukasaun Indonézia ne’ebé sei reprodús iha Timor-Leste independente. Indonézia nu’udar illa boot, populasaun boot, rekursu boot no indústria boot tan ne’e presiza edukasaun massal atu prodús ema ba merkadu empregu ne’ebé boot. Ba kazu edukasaun iha tempu okupasaun Indonézia orienta ba desmobilizasaun nasionalizmu foin-sa’e sira nian ho ideolojia formál estadu nian (Pancasila), edukasaun modelu bankaria, ne’ebé la kestiona no limite de’it ba dezenvolvimentu skill. Sistema edukasaun ne’e hanorin ema atu simu de’it ordem. Efeitu husi sistema eskola ne’e mak maioria jerasaun foin-sa’e ne’ebé hetan edukasaun labele partisipa iha prosesu dezenvolvimentu. Ita bele rejista legadu sistema eskola Indonézia, entre sira mak eskola sekundária jerál mak barakliu duke eskola tékniku vokasionál, universidade hotu-hotu iha fakuldade direitu iha país ki’ik ida ne’ebé hotu-hotu hanorin ho maodelu bankaria. Sistema edukasaun ne’e orienta  ba domestikasaun duke libertasaun tuir Paulo Freire nia hanoin.

Aspetu seluk ne’ebé Helen preokupa tebes mak  hidden curriculum  husi ita-nia sistema eskola. Helen uza Ivan Illich nia pensamentu halo leitura kona-ba kurríkulu ne’ebé portugés no indonéziu dezenvolve. Tuir Helen iha nia artigu How Education both Promotes and Undermines Development in Timor Leste: the Problem of the ‘Hidden Curriculum’, portugés no indonézia kontinua fó mensajen ba nia estudante sira katak tenke evita serbisu iha áreas rurais, katak kultura Timor inferior no ema ida-idak tenke halo buat hanesan, sai funsionáriu públiku iha sidade. Koñesimentu sira iha valór bainhira husi Lisboa no Jakarta, koñesimentu tradisionál ne’ebé hatutan husi jerasaun ba jerasaun kona-ba produsaun ai-han, kulinaria, hakai animal, ai-moruk tradisionál, dalen no kultura laiha valór iha sistema produsaun no reprodusaun edukasaun ezistente.

Helen Hill defende utilizasaun lingua materna nu’udar lingua dahuluk ne’ebé presiza hanorin ba estudante molok aprende lingua foun, iha kazu ne’e portugés. Tuir Helen, bazeia ba evidénsia sira hatudu tiha ona katak estudante aprende ho sira-nia dalen rasik susesu liu atu aprende lingua foun no absorsaun koñesimentu foun.

Helen  luta ba edukasaun Timor-Leste libertadora iha tempu independénsia, la’ós ko’alia de’it maibé hatudu mós iha prátika liuhusi dezenvolve ideia kona-ba kursu dezenvolvimentu komunitáriu. Ideia kona-ba kursu dezenvolvimentu komunitária hahú iha Sahe Institute for Liberation no ho partisipasaun husi Kdadalak Sulimutuk Institute.  Politikamente Timor-Leste hetan ona ninia independénsia maibé sosiál no ekonomikamente povu hasoru problema oioin, liuliu povu ne’ebé maioria moris husi produsaun subsisténsia. Kdadalak Suli Mutu Institute hahú mobiliza kamponés hodi luta ba reforma agraria iha Ermera no Sahe Institute for Liberation fó formasaun polítika liuhusi eskola ativista ba organizadór komunidade. Husi esperiénsia organizasaun rua ne’e no ho koñesimentu luan husi Helen Hill hahú diskute kurríkulu ba estabelesimentu departamentu dezenvolvimentu komunitária iha UNTL. Ideia husi diskusaun iha Sahe Institute for Liberation, Helen lori ba UNTL. Ho apoiu ema barak nia, inklui dosente sira husi membru Sahe Institute for Liberation no Kdadalak Sulimutuk Institute,  kursu Dezenvolvimentu Komunitária ofisialmente formaliza iha UNTL.

Atu haforsa ideia no prátika dezenvolvimentu komunitária, Helen Hill buka fundus atu lori estudantes Timoroan estuda mestradu iha dezenvolvimentu komunitária iha Victoria University iha ne’ebé nia hanorin ba. Ho tempu ne’ebé la’o, Helen Hill hamutuk ho dosente sira husi UNTL estabelese programa mestradu iha Dezenvolvimentu Komunitáriu.

Helen Hill sai inisiadór ba Timor-Leste Studies Association ne’ebé hala’o konferénsia kona-ba Timor-Leste  kada tinan rurua partisipa husi akadémikus no pratikantes husi nasaun oin-oin hodi aprezenta sira-nia peskiza. Aleinde ne’e, Helen  Hill organiza konferénsia kada tinan ruarua ho kooperasaun entre Victoria University ho UNTL ne’ebé ko’alia kona-ba kestaun prátika iha dezenvolvimentu iha Timor-Leste.

Helen depois reforma mai hela iha Timor-Leste hahú iha 2014 hodi serbisu iha Ministériu Edukasaun no iha 2018-2020 envolve iha dezenvolvimentu kurríkulu ensinu sekundáriu. Iha kurríkulu ba ensinu sekundáriu, Helen orienta sistema eskola ne’ebé orienta ba hasa’e koñesimentu ne’ebé liga ho produsaun. Matenek sira ne’ebé hanorin tenke liga ho realidade moris estudante sira nian atu kompriende kona-ba realidade no iha kapasidade atu muda realidade ne’e.

Helen nu’udar buibere estraordinária. Nia la’ós de’it akadémiku maibé mós ativista. Ba Helen, koñesimentu ne’e la’ós ba koñesimentu ne’e rasik, maibé oinsá uza koñesimentu ba halo mudansa no hola parte liuhusi luta ba mudansa, la’ós sai observadór de’it. Nia dedikadu no determinadu ba kauza povu oprimidu la’ós de’it ba Timor-Leste ba maibé povu tomak iha mundu. Nia kontinua apoiu povu nia luta ba independénsia iha Papua, Sahara Osidentál no Palestina. Nia husik nia previleju tomak nu’udar dosente reformadu iha Australia ho moris di’ak no hili mai hela iha Timor hodi kontribui nafatin liuhusi edukasaun ba Timor-Leste ida ne’ebé di’akliu.  Helen nia luta balun atinji ona maibé barak mak husik hela mai ita atu kontinua nia obra.

Molok Paulo Freire atu mate nia hateten: “Ha’u sei nunka hanoin kona-ba edukasaun lahó domin, no tanba ne’e,  Ha’u hanoin Ha’u edukadór ida, tanba Ha’u sente domin.”  Helen Hill dedika nia an tomak ba Timor-Leste durante tinan-50 iha prosesu luta dura hasoru okupasaun Indonézia no husik nia previleju tomak hodi husik nia Australia hodi hamutuk Timoroan harii Timor-Leste ida di’akliu ba Timoroan hotu-hotu. Molok nia iis kotu, nia husu atu rona múzika Timor atu akompaña nia mate. Ne’e hatudu nia domin ba Timor-Leste ne’ebé labele espresa ho liafuan. Nia hadomi Timor-Leste to’o nia mate. Buibere Helen Hill, Prezente!

Print Friendly, PDF & Email

LEAVE A REPLY

Please enter your comment!
Please enter your name here