Home Notisia Prezidente Horta Agradese ba Brunei Darusalam Tanba Apoiu Adezaun TL nian ba...

Prezidente Horta Agradese ba Brunei Darusalam Tanba Apoiu Adezaun TL nian ba ASEAN

708
0
Prezidente Repúblika (PR) José Ramos-Horta, Sua Majestade Sultan Haji Hassanal Bolkiah, (Foto-Media PR)

Reportajen David da Costa

Prezidente Repúblika (PR) José Ramos-Horta agradese ba sua Majestade Sultaun Brunei Darussalam, Tanba sira apoiu adezaun Timor-Leste nian ba iha  Asosiasaun Nasaun Sudeste Áziatiku (ASEAN),  no ba kompromisu Brunei nian ba Timor-nia viajen ba progresu no integrasaun rejionál.

“Ha’u hato’o ha’u-nia agradesimentu kle’an ba Sua Majestade tanba Nia kontinuasaun apoiu ba prosesu adezaun Timor-Leste nian ba ASEAN no ba kompromisu Brunei nian ba ita-nia viajen ba progresu no integrasaun rejionál. Apoiu ida-ne’e sai nu’udar instrumentál iha progresu ne’ebé ita halo ona iha tinan hirak liubá,”  Prezidente Repúblika José Ramos-Horta  hateten bainhira halo nian Diskursu iha Komemorasaun Loron Restorasaun independensia ba da-XXII iha Palásiu Prezidensiál Bairu-Pite, Segunda 20/05.

Nia dehan, Selebra loron istóriku ida-ne’e, atu renova i kompromisu atu hametin liután ligasaun entre  nasaun sira liuhusi promove kooperasaun iha setór oioin, inklui turizmu, infraestrutura bázika, edukasaun, saúde, transporte, indústria (Manufaktura no Estrasaun), agrikultura, peska, floresta, produsaun ai-han no protesaun ambientál.

Timor iha kompromisu atu aproveita oportunidade sira ne’ebé oferese husi Ekonómia Verde no Azúl, hodi aliña Timor-nia aan ho kompromisu sira ba ASEAN no objetivu sira husi COP28.

“Ami kontente tebes ita halibur hamutuk hodi selebra Loron Restaurasaun Independénsia  Nasionál Timor-Leste nian ba dala 22. Iha okaziaun espesiál ida-ne’e, ha’u hato’o ha’u-nia respeitu no benvindu ba ita-nia konvidadu onra nian ne’ebé importante tebes, sua Majestade Sultaun Brunei Darussalam, belun doben ida husi povu Timor-Leste no lider globál ida-ne’ebé di’ak tebes,” Dehan Ramos-Horta.

Brunei Darussalam sai ona hanesan ezemplu ida ba pás no estabilidade iha mundu ida-ne’ebé nakdoko tebes, mundu ida-ne’ebé iha inserteza no dezafiu barak liu duke serteza, mundu ida-ne’ebé la hanesan ho mundu ne’ebé  hein bainhira didin Berlin harahun tiha ona iha loron 9 novembru 1989.

Maibé la’ós buat hotu inserteza no laiha esperansa, Brunei Darussalam hanesan fatin ne’ebé dame, ne’ebé hanesan esperansa ba mundu ne’ebé lakon esperansa ida-ne’e, hanesan ezemplu ida kona-ba oinsá Estadu Boot sira no Lider sira bele hetan no kria pás, armonia, hakmatek ba sira-nia povu.

“Ha’u hanoin-hikas ha’u-nia vizita ba Brunei Darussalam iha novembru 2023 no ha’u simu ona benvindu ne’ebé estraordináriu husi Sua Majestade, membru sira husi Familia Royal no Governu, no mós husi Povu Brunei,”nia esplika.

Sua Majestade Sultan Haji Hassanal Bolkiah, aleinde kaer pozisaun lideransa oin-oin iha nia nasaun ho exelente, sai hanesan ezemplu ida kona-ba lideransa no komprimisu ba pás, toleránsia no fraternidade. Nia mós nu’udar Xefe Estadu ne’ebé mak seniór no esperiénsia barak liu iha Asosiasaun Nasaun Sudeste Áziatiku (ASEAN), nu’udar Monarku dahuluk ne’ebé fó onra ba Timor ho nia prezensa, ho difikuldade no dezafiu sira ne’ebé  nasaun Timor-Leste hasoru atu simu nia.

Ida-ne’e hatudu ninia umildade no karakter simples, lider vizionáriu ida-ne’ebé lidera misaun negosiasaun nian atu hetan independénsia ho dame ba Brunei Darussalam, ne’ebé rezulta Tratadu Amizade no Kooperasaun ho Grande Britania, hodi fó soberania tomak ba Brunei iha tinan 1984.

Timor-Leste no Brunei Darussalam iha prinsípiu hanesan no esforsu hamutuk atu promove ninia sidadaun sira-nia moris-di’ak. Nasaun rua ne’e hasoru dezafiu hanesan nu’udar nasaun joven, no hatudu ona reziliénsia no dedikasaun ba dezenvolvimentu umanu no ekonómiku, ho sidadaun sira hanesan sentru.

“Ami hakarak kontinua halo tuir modelu dezenvolvimentu sustentavel ida-ne’e, amigavel ba ambiente, ho kualidade servisu públiku ne’ebé aas hodi fornese ba ami-nia sidadaun sira asesu ba servisu báziku sira ne’ebé hanesan sira-nia direitu,”Nia haktuir.

Brunei Darussalam hanesan liña dahuluk ne’ebé lidera dezenvolvimentu umanu ho Indíse 0.823, klasifikasaun 50 husi nasaun no territóriu 203 no parte husi nasaun ruanulu-resin-rua ne’ebé riku liu iha mundu ho rendimentu médiu kapitál maizumenus dolar amerikanu 31,410. Tanba ne’e Timor-Leste hein katak setór privadu sira husi nasaun Brunei Darussalam niana atu kolabora hamutuk ho setór privadu sira iha  Timor-Leste ho fo servisu ba Timoroan.

“Ho espíritu kolaborasaun no amizade nian ida-ne’e, ami hein katak setór privadu Brunei Darussalam nian atu kolabora ho ami-nia setór privadu nasionál kona-ba empreza foun sira ne’ebé bele fó benefísiu ba ita-nia povu no promove dezenvolvimentu sustentavel iha rejiaun laran tomak,” Nia hateten.

Espera katak vizita Estadu ne’e sei fó-hanoin fali kona-ba saida mak Timor-Leste atinje hamutuk no inspirasaun ba futuru ne’ebé naroman liután ba Timor-Leste no Brunei Darussalam.

“Ha’u agradese ba ita hotu ne’ebé mai hamutuk ho ami iha momentu signifikativu ida-ne’e. Hein katak dame no prosperidade sempre hamutuk ho ita,” nia dehan.

Print Friendly, PDF & Email

LEAVE A REPLY

Please enter your comment!
Please enter your name here