Home Analisa Politika Partidarizmu Hafraku Sistema Administrasaun Publika iha TL

Politika Partidarizmu Hafraku Sistema Administrasaun Publika iha TL

1044
0
hakerek nain Jemicarte Moniz dos Reis. [Foto: Dokumentu privadu | 29.12.2020]

Hakerek nain Jemicarte Moniz dos Reis

Realmente iha kontestu ida agora sistema administrasaun publiku hanesan impata dezenvolvimentu em jeral. Ho situasaun agora ne’e ema barak iha esperiensia, maibé susar ba ema atu sai kreativu. Dala barak, halakon ema nia vontade atu halo buat foun tanba estadu la fasilita. Ida ne’e bele hamenus sidadaun nia konfiansa ba iha instituisaun publiku. Melloramentu servisu administrasaun públiku la’os prosesu ida ne’ebé fasil maibé presiza tempu naruk. Ho mundu ida ne’ebé dinamiku, administrasaun públiku presiza ajusta an ho mudansa iha sosiedade nia laran. Sa tan alvu hosi servisu administrasaun públiku nian mak públiku. Tanba ne’e avaliasaun ba servisu administrasaun públiku la para deit iha produtividade, maibé mos oinsa públiku nia satisfasaun ba servisu administrasaun públiku. Ho mundu modernu ida agora, administrasaun públiku tenki loke-an atu hatan ba mudansa hirak ne’e. Tanba ne’e presiza iha inovasaun no kreatividade iha administrasaun públiku tanba públiku nia padraun atu hetan satisfasaun muda hosi tempu ba tempu.

Nune’e Administrasaun públiku tenke harii iha fundasaun ida forte hanesan temin tiha ona iha Konstituisaun RDTL Artigu 137o (Prinsípiu Jerál Administrasaun Públiku ninian)

1. Administrasaun Públiku haree ba prosekusaun interese públiku nian, ne’e mak  respeitu ba interese lejítimu sidadaun  no instituisaun konstitusionál sira-nian.

2. Administrasaun Públiku nia estrutura iha dalan ida atu sees husi birokratizasaun, buka dada besik populasaun sira-nia serbisu no kaer metin interese partisipasaun nian iha nia jestaun efetivu.

3. Lei harii administradu sira-nia direitu no garantia, liu-liu hasoru hahalok sira-ne’ebé viola sira-nia direitu no interese lejítimu.

Nune’e sai hanesan valor no identidade rasik, no ka’er metin prinsipiu meritokratiku katak la iha intervensaun arbiru hosi polítika na’in sira, hodi nune’e bele presta ninia serbisu ho justu, la todan ba ema ida, iha sensibilidade, transparensia, iha vontade di’ak hodi disponibel no prontu atu serbí ka fó atendementu ba interese no nesesidade públiku ka povu nian.

Dala barak ita hanoin katak sidadaun nia asesu ba servisu públiku nuudar karidade ne’ebé estadu halo ba sidadaun sira, karik tanba la selu. Ita haree sidadaun sira ne’ebé buka atu hetan servisu públiku susar tebes. Ida ne’e kontradiz ho nasaun sira seluk, sa tan iha kontestu ida ne’ebé ita harii hela ita nia instituisaun públiku sira. Sidadun nia asesu ba servisu públiku nuudar kestaun direitu fundamental ne’ebé proteze iha konstitusaun, Artigu 500 (Direitu ba servisu) katak sidadaun hotu-hotu, feto ka mane, iha direitu no devér atu halo servisu no livre atu hili nia profisaun. No konvensaun internasional kona ba direitu sivil no politika iha Artigu 3 hateten katak estadu parte sira kompromete atu asegura direitu hanesan ba mane no feto sira hodi goza direitu sivil no politika hirak ne’ebé estadu Timor hola parte ba. Iha kontestu dezenvolvimentu ekonomia, melloramentu iha administrasaun públiku nuudar kestaun xavi atu atinzi kresimentu ekonomia ne’ebé inklusivu no sustentavel.

Tuir mai tenta koloka dezafiu hun tolu ne’ebé hafraku sistema administrasaun públika iha Timor-Leste no presiza rezolve lalais mós  iha futuru oin mai:

  1. Dezafiu iha nivel polítika
  2. Problema kriasaun estrutura ho ninia funsaun, purezemplu kria estrutura ministériu ka sekretaria estadu balu ho naran bo’ot maibé ninia funsaun no kompetensia kiik. Pelu kontrariu kria ministériu ka gabinete ida ne’ebé iha responsabilidade ka kompetensia bo’ot maibé la konsidera tiha fali. Ita la kestiona prátika hanesan ne’e tanba ida ne’e desizaun polítika hosi ulun na’ain sira, maibé preokupa de’it ho ninia impaktu ba funsionamentu administrasaun públiku, esforsu ba reforma administrativa no kapasitasaun ba administrasaun públiku la iha abut ne’ebé metin no la sustentavel.
  3. Intervensaun polítika iha prosesu no funsionamentu funsaun públiku, atetude polítika na’in sira entre ko’alia no implementasaun iha prátika, purezemplu nomeia funsionáriu públiku ida ba ka’er kargu nuudar diretór ka diretór jeral tanba relasaun kolegial ka mai hosi partidu polítiku hanesan. 
  4. Dezafiu iha jestaun, falta normas prosedimentu, no fraku iha kontrolu hodi hamosu duun malu halo korrupasaun iha ne’e no iha ne’ebá, no mal administrasaun, nsst. Burokrasia sai nuudar red tape, neneik tebes, la sensitvu ba nesesidade públiku, utilizaaun ba rekursu ne’ebé saugati de’it tanba foka liu ba prosesu no prosedura la’os rezultadu no ikus mai hamosu persepsaun no konotasaun negativu hosi ema públiku katak administrasaun públiku sai naha todan.
  5. Dezafiu iha kapasidade rekurusu umanu. Kapasidade rekursu umanu la’os haree de’it hosi aspetu abilidade no koñesementu maibé mós hosi atetude no komportamentu. Formsaun atu hasa’e kapasidade funsionáriu públiku hahuu kedas tiha ona hosi tinan 2002 to’o ohin loron, tantu halo iha rai laran no haruka ba rai liur. Ohin loron barak mak ba hasai tan kursu bo’ot mestradu to Doutoramentu iha area oioin maibé to ikus governu la uza rekursu sira ho kualifikadu ne’e tan deit kestaun politika. Sira ne’ebé hetan nomeasaun husi partidu politiku kapasidade balun mak konsege elevadu no iha sorin seluk governu rasik mak sei dehan katak kapasidade funsionáriu sira sei fraku hela. No Indikasaun ida mak serbisu administrasaun públiku nian maioria sei depende makaas hela ba apoiu asesória.

Dezafiu hirak temin iha leten mak sai hanesan razaun fundamental ba Governu to’o ohin loron.

Nu’une reforsa klean liu tan husi matenek nain Heady (1995) hateten katak atu halo análiz ba dezenvolvimentu administrasaun presiza atu hatene figura ka ideia hosi administrasaun públiku ne’ebé komun iha país sira sei iha prosesu dezenvolve aan hela (developing countries). Nune’e nia salienta katak iha karakterístika lima atu deskreve país hirak ne’e. Primeiruformasaun báziku administrasaun públiku sei halo tuir ka imita (imitative) hosi sistema seluk (sistema rai/nasaun seluk), la’os orijinal (indegenious). Segundu, burokrasia iha país hirak ne’e sei falta (difisit) ka iha limitasaun kbiit ka kapasidade rekursu umanu atu halo dezenvolvimentu ho efikaz no efisiente. Defisit ida ne’e la’os deit iha parte kuantidade maibe mós kualidade. Hosi parte kuantidade, país hirak ne’e iha tendensia rekruta funsionariu ne’ebé barak tebes (overstafed) maibe la iha balansu ho kualidade kapasidade ne’ebé nesesariu atu halao dezenvolvimentu nasional. Terseiru, burokrasia ka burokrat sira la halao sira nia funsaun/serbisu tekníku ne’ebé produktivu maibe halo tuir deit orientasaun politíka partidu nian, grupu nomós interese privadu. Kuartu, iha lakuna/gap/kesenjangan/discrepancy entre politíka (policy, kebijakan) no nia implementasaun. La iha konsistensia (lack of consistency) no la koresponde ba malu entre vizaun, polítika no aksaun ka prátika iha terenu. Kintu, burokrasia iha país hirak ne’e dala barak konsidera no senti sira nia aan hanesan hamrik mesak (autonómo), signifika la iha kontrolu hosi ema seluk ka povu ba sira nia serbisu no atetude. Lia fuan seluk bele dehan katak burokrasia sai hanesan liurai kiik ka kerajaan-kerajaan kecil. Karakterístika no mentalidade hirak ne’e sai hanesan eransa kolonialista sira ne’ebé ukun ho absoluta, atetudi feodal durante tempu naruk kolonializasaun no okupasaun nian no kontinua nafatin maske país hirak ne’e ukun rasik aan tiha ona. Bainhira ukun rasik a’an, matenek oan no grupu elite sira maka tama hotu ka iha asesu ba burokrasia, sira maka hatene liu no halo ema seluk defisil atu dizafia nomós halo kontrolu ba sira.

Iha sorin seluk tuir matenek nain Willis (1989) Iha livru Yate, Douglas nia akresenta tan karakteristíka rua. Ida, iha país hirak ne’e serbisu burokrasia la’o neneik tebes no sai burokratíku liu tan (burokratizasaun). Rua, burokrasia hetan influensia maka’as hosi faktor relasaun familia, primordializmu hanesan suku, relijiaun, no mós relasaun politíka (political connections).

Husu ba Nai Ulun sira katak hakarak Administrasaun ida ne’ebé lao diak liutan iha futuru Presiza aplika valor no identidade administrasaun públiku Timor-Leste nian hanesan harii Administrasaun Públika ida ne’ebé la’o lais no mamar, atu serbi interese lejitimu sidadaun sira nian no mós instituisaun estadu sira nian, ne’e mak nu’udar ezijensia husi konstituisaun no mós nasaun nia hakarak. Nu’une harii no kaer metin estadu nia apareliu funsional ne’ebé lao mamar no partisipativu atu bele duni toman dezenvolvimentu social ne’ebé armoniozu no sustentavel iha rai laran. No Administrasaun Públika tenke tuur iha estrutura ida ne’ebé bele sees an husi dalan burokratizasaun nian, hakbesik ba komunidade atu bele serbi no dudu atu ema sira bele partisipa iha knar seluk no halo jestaun ba buat hotu-hotu públiku nian. Solusaun atu hadia sistema administrasaun iha timor leste mak hanesan tuir mai ne’e: Presiza aplika valor no identidade administrasaun públiku Timor-Leste nian hanesan Dezenvolve Administrasaun Públiku Banati Tuir Identidade Nasaun Timor-Leste aprezenta valor iha simbólu nasional Timor-Leste sai nuudar valor no identidade administrasaun públiku Timor-Leste nian hanesan Unidade, Aksaun, no Progressu. Presiza hadia kapasidade iha nivel ambiente polítika Maski ida ne’e desizaun polítika governu nian maibe tenke hadia estrutura balun izisti ho naran bo’ot maibé responsabilidade no kompetensia kiik. presiza hadia atitude no komportamentu lideransa polítika na’in sira konsistensia entre polítika no prátika. Presiza hadia jestaun no funsaun institusional administrasaun públiku Kria Ajensia Planeamentu Nasional ida hodi responsabiliza ba koordenasaun, halo monitorizasaun no avaliasaun ida rigorozu, sistematíka ba implementasaun polítika, planu, no programa Governu nian. Presiza hadia kapasidade rekursu umanu Iha Instituisaun hotu tuir Planu asaun ba dezenvolvimentu kapasitasaun ne’e importante tebes hodi liga mós ba identifikasaun nesesidade instituisaun nian. No ikus liu Governu presiza tau ninia ema tuir Merito ka ninia area espesializada ne’ebé nia iha nune’e bele hala’o servisu ho lais efisiensia efikasi no kualidade.

Tan ne’e duni Administrasaun tenke banati tuir norma lubun ne’ebé iha sistema nia laran, ba prinsipiu no valor oi-oin liu liu ba integridade, meritu no exelensia iha knar nudar públiku nia serbi nain tuir norma sira ne’ebé bele garante katak ita bele duni ita nia objektivu nasional sira atu hetan progresu ba dezenvolvimentu ida ne’ebé justu no ekuilibriu.

Konkluzaun

Konstrusaun estadu defisil tanba iha fatór oioin ne’ebé bele teri netik iha dalan klaran, la’os de’it mai hosi sosiedade ninia kapasidade, atetude no komportamentu, maibé mós mai hosi sistema polítika, ninia estrutura no funsionamentu inklui administrasaun públiku. Administrasaun públiku tenke harii iha fundasaun ida forte hanesan temin tiha ona iha Konstituisaun RDTL artigu 137, valor no identidade rasik, no ka’er metin prinsipiu meritokratiku katak la iha intervensaun arbiru hosi polítik na’in sira, hodi nune’e bele presta ninia serbisu ho justu, la todan ba ema ida, iha sensibilidade, transparensia, iha vontade di’ak hodi disponibel no prontu atu serbí ka fó atendementu ba interese no nesesidade públiku ka povu nian.

Rekomendasaun ba Governu Timor-Leste:

  1. Presiza aplika valor no identidade administrasaun públiku Timor-Leste nian.
  2. Presiza hadia kapasidade iha nivel ambiente polítika.
  3. Presiza hadia atitude no komportamentu lideransa polítika na’in sira konsistensia entre polítika no prátika.
  4. Presiza hadia jestaun no funsaun institusional administrasaun públiku.
  5. Presiza hadia kapasidade rekursu umanu Iha Instituisaun hotu
  6. Presiza komprende didiak kna’ar no resposabilidade nudar gestor.
  7. Governu presiza tau ninia ema tuir Merito ka ninia area espesializada ne’ebé nia iha nune’e bele hala’o servisu ho efisiensia no kualidade.

REFERENSIA

  1. Heady. Papers in comparative public Administration, Resist Book Yogyakarta 1995.
  2. Yate, Douglas. Bureucratic Democasy: The Search for Democracy and Efficiency in American Governament. Cambridge, MA: Harvard University Press.1989.
  3. Konstituisaun Republika Demokratika de Timor-Leste (RDTL).Vigor iha Loron 20 de Maio de 2002.
  4. Lei Komisaun Estatutu Funsaun Publica no.8/2004 /16 de junho.
  5. Konvensaun Internasional Kona ba Direitu Sivil no Politika.1976.
  6. Jornal Nacioanal Diário edisaun 28 Juñu 2010.
Print Friendly, PDF & Email

LEAVE A REPLY

Please enter your comment!
Please enter your name here